ބޮލީވުޑްގެ ހުނަރުވެރި އެކްޓަރު ރާޖްކުމާރް ރާއޯ އާއި ދެކުނު އިންޑިއާގެ މަޝްހޫރު ބަތަލާ ކީރްތީ ސުރޭޝް އެކުގައި ފެނިގެންދާ އާ ފިލްމު "ރަފްތާރު" ރިލީޒްކުރާ ތާރީޚު އެމެޒޯން އެމްޖީއެމް ސްޓޫޑިއޯސް އިން އިއުލާންކޮށްފިއެވެ.

މި ފިލްމު ސިނަމާތަކަށް އަންނާނީ މިއަހަރު ޖުލައި މަހު 24 ގައެވެ.

އަދިތިޔާ ނިމްބާލްކަރު ޑައިރެކްޓްކުރާ މި ފިލްމަކީ ކަމްޕާ ފިލްމްސްގެ ބެނާގެ ދަށުން ޕަޓްރަލޭކާ އުފައްދާ ފިލްމެކެވެ. މި ފިލްމުގެ އެގްޒެކެޓިވް ޕްރޮޑިއުސަރަކީ ތަރުން ބާލީ އެވެ. ރޯހަން ނަރުލާގެ ވާހަކަ އާއި ސްކްރީންޕްލޭއަށް ތައްޔާރުކޮށްފައިވާ މި ފިލްމުގައި ރާޖްކުމާރް އާއި ކީރްތީގެ އިތުރުން، އަނޫރާގް ތާކޫރް، ރޯހަން ވަަރުމާ، ތާނިޔާ މަނިކްތަލާ އަދި ރަޖަތު ކަޕޫރު ފަދަ ހުނަރުވެރި ތަރިން މުހިންމު ރޯލުތަކުން ފެނިގެންދާނެއެވެ.

"ރަފްތާރު" ބިނާވެފައިވަނީ ކާމިޔާބީ ހޯދުމަށް ކުރާ މަސައްކަތާއި، ބޮޑެތި އެމްޕަޔަރުތައް ބިނާކުރުމުގެ ތެރޭގައި ކުރިމަތިވާ ގޮންޖެހުންތަކުގެ މައްޗަށެވެ. ފިލްމުގެ މައިގަނޑު ވާހަކަ އެނބުރެނީ ވަރަށް ހަލުވިކަމާއެކު ކުރިއަރަމުން އަންނަ ސްޓާޓް-އަޕް ކުންފުންޏެއްގެ ތެރޭގައެވެ. މި ކުންފުނީގެ ތެރޭގައި ހިތްވަރުގަދަ ފިރިހެނަކާއި އުންމީދުތަކުން ފުރިގެންވާ އަންހެނެއްގެ މެދުގައި އުފެދޭ ވަރުގަދަ ގުޅުމެއް މި ފިލްމުން ފެނިގެންދާނެއެވެ.

ފައިސާ އާއި، ބާރާއި، ދަހިވެތިކަން އިތުރުވަމުންދާ ވަރަކަށް، ކާމިޔާބީ ހޯދުމަށް އެމީހުން ކުރާ މަސައްކަތް ލޯތްބާ ފުށުއަރަން ފަށައެވެ. ކާމިޔާބީގެ އުސްމިންތަކަށް ދިއުމަކީ އުފާވެރި ކަމެއް ނަމަވެސް، އެ ހަރުފަތުން ވެއްޓުމަށްފަހު އަލުން ކުރީގެ މަގާމަށް ދެވޭނެތޯ ނުވަތަ އެއީ ހުރިހާ ކަމެއްގެ ނިމުންތޯ މި ފިލްމުގައި ސުވާލު އުފައްދައެވެ.