އިންސާނާގެ ފުރާނައަކީ މާތް ﷲ އަޅަމެންނަށް ދެއްވާފައިވާ އެންމެ އަގުބޮޑު އަމާނާތެވެ. ދިރިއުޅުމުގެ ދަތުރުގައި އެކި ކަހަލަ ގޮންޖެހުންތަކާއި ހިތާމަތަކާ ކުރިމަތިވުމަކީ އިންސާނީ ތަބީޢަތެވެ. ނަމަވެސް، ކުރިމަތިވާ ކޮންމެ ނުތަނަވަސްކަމަކުން ސަލާމަތްވުމަށް އަމިއްލައަށް މަރުވުމަކީ ދީނީ ގޮތުންނާއި، ބުއްދީގެ ގޮތުން ބެލިޔަސް އެއްވެސް މައްސަލައެއްގެ ޙައްލެއް ނޫނެވެ.

އިސްލާމްދީނުގައި އަމިއްލައަށް މަރުވުމުގެ ޙުކުމް

އަމިއްލައަށް މަރުވުމަކީ އިސްލާމްދީނުގައި ބޮޑުވެގެންވާ ފާފައެކެވެ. މާތް ﷲ ކީރިތި ޤުރްއާނުގައި އަމިއްލައަށް މަރުވުން ނަހީކުރަށްވައި ވަޙީކުރަށްވާފައިވެއެވެ. "އަދި، ތިޔަބައިމީހުންގެ އަމިއްލަ نفس ތައް ތިޔަބައިމީހުން قتل ނުކުރާށެވެ! ހަމަކަށަވަރުން، ތިޔަބައިމީހުންގެ މައްޗަށް رحيم ވަންތަ ރަސްކަލާނގެ ކަމުގައި اللَّه ވޮޑިގެންވެއެވެ." (ސޫރަތުއްނިސާ: 29). މި އާޔަތުން އެނގެނީ އިންސާނާ ކިތަންމެ ބޮޑު ތަކުލީފެއްގައި އުޅެން ޖެހުނަސް، އަމިއްލަ ނަފްސަށް ގެއްލުން ދިނުމަކީ ހުއްދަވެގެންވާ ކަމެއް ނޫން ކަމެވެ.

ކީރިތި ރަސޫލާ صلى الله عليه وسلم ގެ ޙަދީޘްފުޅުތަކުން އެނގޭ ގޮތުގައި، އަމިއްލައަށް މަރުވާ މީހާއަށް އާޚިރަތުގައި ގަދަފަދަ ޢަޛާބު ހުއްޓެވެ. ރަސޫލާ صلى الله عليه وسلم ޙަދީޘްކުރެއްވި ބަސްފުޅެއްގެ މާނައިގައިވެއެވެ. "މީހަކު އެއްޗަކުން އަމިއްލައަށް މަރުވެއްޖެނަމަ، ޤިޔާމަތް ދުވަހުން އެ އެއްޗަކުން އޭނާއަށް ޢަޛާބު ދެވޭނެއެވެ."

އަމިއްލައަށް މަރުވުމަކީ ބޮޑު ފާފައެއް ނަމަވެސް، އެމީހަކީ ބުއްދި ސަލާމަތުން ހުރި މީހެއް ނަމަ، އޭނާ އިސްލާމްދީނުން ބޭރު ނުވާނެ ކަމަށާއި، އޭނާގެ މައްޗަށް ކަށުނަމާދު ކުރަންޖެހޭނެ ކަމަށް ގިނަ ޢިލްމުވެރިން ވިދާޅުވެއެވެ. ނަމަވެސް، ބައެއް ޢިލްމުވެރިން ދެކިލައްވާ ގޮތުގައި އިލްމުވެރިންނާއި ޤަދަރުވެރިން އެފަދަ މީހެއްގެ މައްޗަށް ކަށުނަމާދު ނުކޮށް ދޫކޮށްލުމަކީ އެހެން މީހުންނަށް ދެވޭ އިބްރަތެކެވެ.

ރައްކާތެރިކަމުގެ ފިޔަވަޅުތަކާއި ޙައްލު

ނުރައްކާތެރި ޚިޔާލުތަކުން ދުރުވުމަށްޓަކައި އަންނަނިވި ކަންކަމަށް ސަމާލުކަން ދިނުން މުހިންމެވެ:

އީމާންކަން ވަރުގަދަކުރުން: މާތް ﷲ ގެ މިންވަރުފުޅަށް އީމާންވުމާއި، ކޮންމެ ދަތިކަމަކަށްފަހު ފަސޭހަކަމެއް ވާނެކަން ގަބޫލުކުރުން.

ޒިކުރުކުރުމާއި ދުޢާ: ހާސްކަމާއި ނުތަނަވަސްކަން ކުރިމަތިވާ ހިނދު ގިނަގިނައިން ﷲ ހަނދުމަކޮށް، "اللَّهُمَّ إِنِّي أَعُوذُ بِكَ مِنَ الْهَمِّ وَالْحُزْنِ" (އޭ ހައްދަވާ ބޮޑުކުރެއްވި ރަސްކަލާކޮ ހިތާމައާއި ހާސްކަމުން މިއަޅާ އިބަރަސްކަލާނގެ ރަޙުމަތަށް އެދި ރައްކާތެރިކަން ހޯދަމެވެ) ފަދަ ދުޢާތައް ކުރުން.

އެހީތެރިކަން ހޯދުން: ނަފްސާނީ ބަލިތަކަކީ ފަރުވާ ހޯދަންޖެހޭ ބަލިތަކެކެވެ. ޑޮކްޓަރެއްގެ ނުވަތަ ކައުންސިލަރެއްގެ އެހީތެރިކަން ހޯދުމަކީ ދީނީ ގޮތުންވެސް ކުރަންޖެހޭ ކަމެކެވެ.

އާއިލާގެ ދައުރު: ގާތް މީހުންނާ ވާހަކަދެއްކުމާއި، އެކަނިވެރި ނުވުން.

ކެތްތެރިވުން: ދުނިޔެއަކީ އިމްތިޙާނެއްކަން ދަނެ، ކުރިމަތިވާ ގޮންޖެހުންތަކަށް ކެތްތެރިވުމަކީ ބޮޑުވެގެންވާ އަޖުރު ހުރި ކަމެކެވެ.

ނަފްސާނީ ދުޅަހެޔޮކަމާއި ދީނީ ފަރުވާ

އަމިއްލައަށް މަރުވާން ބޭނުންވާ ގިނަ މީހުންނަކީ ނަފްސާނީ ބައްޔެއްގެ ޝިކާރައަކަށް ވެފައިވާ މީހުންނެވެ. އިސްލާމްދީނަކީ ބަލިތަކަށް ފަރުވާ ހޯދުމަށް އަމުރުކުރާ ދީނެކެވެ. ނަފްސާނީ ބަލިތަކަކީ ސިކުނޑީގެ ކެމިކަލްތަކަށް އަންނަ ބަދަލަކުން ދިމާވާ ކަމަކަށް ވާތީ، ބޭސްފަރުވާއާއި ކައުންސިލިންގް ހޯދުމަކީ ދީނާ ޚިލާފު ކަމެއް ނޫން ކަމުގައި ދަންނަންޖެހެއެވެ. ﷲ ގެ ރަޙުމަތުން އުންމީދު ކަނޑާލުމަކީ މުއުމިނުންގެ ސިފައެއް ނޫނެވެ.

އެހީތެރިވާނެ ގޮތާއި މުޖުތަމަޢުގެ ދައުރު

އަމިއްލައަށް މަރުވާން އުޅޭ މީހަކު ފާހަގަވެއްޖެނަމަ، އެމީހެއްގެ ވާހަކަ ގާތްކަމާއެކު އަޑުއަހަންވާނެއެވެ. އެއީ ހަމައެކަނި ބިރުގަންނަވަން ބުނާ އެއްޗެއް ކަމަށް ނުބަލައި، ސީރިއަސްކޮށް ނަގައި އެކަނި ދޫނުކުރާށެވެ. އަދި ވީހާވެސް އަވަހަކަށް ޕްރޮފެޝަނަލް އެހީތެރިކަން ހޯދައިދޭންވާނެއެވެ. މުޖުތަމަޢުގެ ފެންވަރުގައި ނަފްސާނީ ބަލިތަކާ މެދު ހޭލުންތެރިކަން އިތުރުކޮށް، އެފަދަ މީހުން "އީމާންކަން ކުޑަ" ބައެއްގެ ގޮތުގައި ލޭބަލް ކުރުން ހުއްޓާލަންޖެހެއެވެ.

އަމިއްލައަށް މަރުވުމަކީ ދުނިޔޭގެ ވަގުތީ ތަކުލީފަކުން ސަލާމަތްވުމަށްޓަކައި، އާޚިރަތުގެ ދާއިމީ ޢަޛާބަށް ހުށަހެޅިގަތުމެކެވެ. ކޮންމެ މީހަކަށްވެސް އެހީތެރިކަން ބޭނުންވާނެ ވަގުތު އަންނާނެއެވެ. އެހީއަށް އެދުމަކީ ބަލިކަށިކަމެއް ނޫނެވެ. އެހީތެރިކަން ބޭނުންނަމަ، ރާއްޖޭގެ ހެލްޕްލައިން 1677 އަށް ގުޅައިގެން ނަފްސާނީ އެހީތެރިކަން ހޯދުމަކީ އެންމެ ބުއްދިވެރި ގޮތެވެ.

މަސްދަރު: (އައްޝައިޚް މޫސާ އަންވަރު ޙަސަންގެ ފޭސްބުކް ޕޭޖް)