ދުނިޔޭގެ ފެންވަރުގައި މަގުބޫލުކަން ހޯދާފައިވާ އިންޑިއާގެ ފަންނާނު ޕްރިޔަންކާ ޗޯޕްރާ، ހޮލީވުޑްގެ އައިކަން އެންޖެލީނާ ޖޯލީއާއެކު އާ މަޝްރޫއެއްގައި މަސައްކަތް ކުރަން އުޅޭކަން ހާމަކޮށްފިއެވެ.

ޕްރިޔަންކާ މިކަން ކަށަވަރުކޮށްދިނީ ދާދި ފަހުން "ފޯޗޫން އިންޑިއާ" އަށް ދިން އިންޓަވިއުއެއްގައެވެ. ޕްރިޔަންކާ ހާމަކުރި ގޮތުގައި އެންޖެލީނާ ޖޯލީއާއެކު މަސައްކަތް ކުރުމުގެ ތައްޔާރީތައް ވަމުންދިޔަ ނަމަވެސް، އެއީ ކޮން ބާވަތެއްގެ މަސައްކަތެއްކަން މިވަގުތު އޮތީ ސިއްރުކުރެވިފައެވެ.

މި އިއުލާނާއެކު ސަޕޯޓަރުންގެ މެދުގައި ބޮޑު ޝައުގުވެރިކަމެއް އުފެދިފައިވާއިރު، މިއީ ފިލްމެއްތޯ، ބްރޭންޑް ކެމްޕޭނެއްތޯ ނުވަތަ އިންސާނީ އެހީތެރިކަމުގެ މަސައްކަތެއްތޯ ސުވާލު އުފެދިފައިވެއެވެ. މި އިންޓަވިއުގައި ޕްރިޔަންކާ ވަނީ އޭނާ ނަމޫނާގެ ގޮތުގައި ބަލާ ހޮލީވުޑްގެ އަންހެން ތަރިންގެ ތެރޭގައި އެންޖެލީނާ ޖޯލީ، ޕެނެލޮޕީ ކްރޫޒް އަދި ސަލްމާ ހަޔެކް ހިމެނޭކަން ފާހަގަކޮށްފައެވެ.

ހަތް އަހަރަށްފަހު އިންޑިއާގެ ސިނަމާއަށް އެނބުރި އައުމަށް ތައްޔާރުވަމުންދާ ޕްރިޔަންކާގެ ކުރިއަށް އޮތް އެންމެ ބޮޑު މަޝްރޫއަކީ މަޝްހޫރު ޑައިރެކްޓަރު އެސް.އެސް ރާޖަމޯލީގެ "ވަރަނާސީ" އެވެ. ގާތްގަނޑަކަށް 1،200 އާއި 1،400 ކްރޯޑް ރުޕީސް (135-150 މިލިއަން ޑޮލަރު) އާ ދެމެދުގެ ބޮޑު ބަޖެޓަކުން އުފައްދާ މި ފިލްމަކީ އިންޑިއާގައި މިހާތަނަށް އުފައްދާ އެންމެ އަގުބޮޑު އެއް ފިލްމެވެ. ޖޯޖިއާ، އެންޓާކްޓިކާ، އެފްރިކާ އަދި ހައިދަރުއާބާދު ފަދަ ތަފާތު ސަރަހައްދުތަކުގައި މަންޒަރުތައް ނަގާފައިވާ މި ފިލްމާ ބެހޭގޮތުން ޕްރިޔަންކާ ބުނީ، މިއީ ވަރަށް ބޮޑު އުންމީދުތަކަކާއެކު ދުނިޔޭގެ ފެންވަރުގައި ރިލީޒްކުރާނެ ފިލްމެއް ކަމަށެވެ. މި ފިލްމު ދުނިޔޭގެ ސިނަމާތަކަށް އަންނާނެ ކަމަށް ތާވަލުކޮށްފައިވަނީ 7 އޭޕްރީލް 2027 ގައެވެ.

ރާޖަމޯލީގެ ފިލްމުގެ އިތުރުން ވެސް ޕްރިޔަންކާގެ ގިނަ މަސައްކަތްތަކެއް ކުރިއަށް އެބަހުއްޓެވެ. އޭގެ ތެރޭގައި އޮރްލާންޑޯ ބްލޫމްއާއެކު ފެނިގެންދާ ޕީ.ޕީ.ޕީ ކޯ ޕްރޮޑަކްޝަނަކާއި، މީރާ ނައިރުގެ "އަމްރީ" އަދި ވިލް ފެރެލް އާއި ޒެކް އެފްރޯން ފަދަ ތަރިންނާއެކު ފެނިގެންދާ "ޖަޖްމަންޓް ޑޭ" ހިމެނެއެވެ.

ޕްރިޔަންކާ އިތުރަށް ބުނިގޮތުގައި، މިހާރު އޭނާގެ ކެރިއަރު އޮތް ހިސާބުން ބޭނުންވާ މަޝްރޫއުތައް އަމިއްލައަށް އިޚްތިޔާރުކުރުމުގެ ފުރުސަތު އޭނާއަށް ވަނީ ލިބިފައެވެ. "އަހަރެން ފެށިއިރު ސްކްރިޕްޓްތައް ހުންނަނީ އަހަރެން ބޭނުންވާ ގޮތަކަށް ނޫން. އެކަމަކު މިހާރު އަހަރެން ބޭނުންވާ މަސައްކަތްތައް އަމިއްލައަށް އިޚްތިޔާރުކޮށް، އަމިއްލަ މަޝްރޫއުތައް އުފެއްދުމުގެ މިނިވަންކަން އެބައޮތް،" ޕްރިޔަންކާ ފާހަގަކުރިއެވެ.