ބޮލީވުޑްގެ މަޝްހޫރު ތަރިން ކަމަށްވާ އަކްޝޭ ކުމާރާއި ސައިފް އަލީ ޚާން އެކުގައި ފެނިގެންދާ އުންމީދީ ފިލްމު "ހައިވާން" ރިލީޒްކުރާ ތާރީޚު ރަސްމީކޮށް އިޢުލާންކޮށްފިއެވެ.

ގިނަ ދުވަސްތަކެއްގެ އިންތިޒާރަށްފަހު، މި ސަސްޕެންސް ތުރިލާ ސިނަމާތަކަށް އަންނާނީ ސެޕްޓެމްބަރު 11 ގައެވެ.

ފިލްމު އުފައްދާ ފަރާތްތަކުން ސޯޝަލް މީޑިއާގައި މި ފިލްމުގެ ފުރަތަމަ ޕޯސްޓަރު އާންމުކޮށްފައިވާއިރު، މިއީ މަޝްހޫރު ޑައިރެކްޓަރު ޕްރިޔަދަރްޝަންގެ އުފެއްދުމެކެވެ. ޕްރިޔަދަރްޝަން އާންމުކޮށް މަޝްހޫރުވެފައިވަނީ މަޖާ ކޮމެޑީ ފިލްމުތައް އުފެއްދުމަށް ނަމަވެސް، "ހައިވާން" ވެގެންދާނީ ވަރަށް ތަފާތު، ބިރުވެރި އަދި ކަންތައްތަކެއް އޮޅުންބޮޅުންވެފައިވާ ވަރުގަދަ ތުރިލާ އަކަށެވެ.

މި ފިލްމަކީ 2008 ވަނަ އަހަރު ރިލީޒްކުރި "ތަޝަން" އަށް ފަހު، ގާތްގަނޑަކަށް 18 އަހަރުގެ މެދުކެނޑުމަކަށްފަހު އަކްޝޭ ކުމާރާއި ސައިފް އަލީ ޚާން އެކުގައި ސްކްރީނުން ފެނިގެންދާ ފުރަތަމަ ފިލްމެވެ. މި ދެ ތަރިންގެ އިތުރުން ބޮލީވުޑްގެ ނަން މަޝްހޫރު އެތައް ތަރިންނެއް މި ފިލްމުން ފެނިގެންދާނެއެވެ. އޭގެ ތެރޭގައި ކާޖޮލް، ބޮބީ ޑިއޯލް، ބޯމަން އިރާނީ، ޝްރިޔާ ޕިލްގާއޮންކަރު، ސައްޔާމީ ކޭރް އަދި ޖިއްޝޫ ސެންގުޕްތާ ހިމެނެއެވެ.

މީގެ އިތުރުން، މަލަޔާޅަމް ސިނަމާގެ ލެޖެންޑް މޯހަންލާލްވެސް މި ފިލްމުގެ ހާއްސަ ފެނިލުމަކުން ފެނިގެންދާނެ ކަމަށް ޑައިރެކްޓަރު ވަނީ ކަށަވަރުކޮށްދީފައެވެ. ނަމަވެސް އޭނާ ކުޅޭނީ ކޮން ކަހަލަ ރޯލެއްކަން އަދި ހާމައެއް ނުކުރެއެވެ.

ޕްރިޔަދަރްޝަން ބުނި ގޮތުގައި އޭނާ އަބަދުވެސް އިސްކަންދެނީ ތަރިންނަށްވުރެ ބޮޑަށް ފިލްމުގެ ސްކްރިޕްޓަށެވެ. އަދި މި ފިލްމުގެ ކާސްޓް ހަމަޖެއްސީވެސް ވާހަކައާ ގުޅޭގޮތަށް އެންމެ އެކަށީގެންވާ ތަރިންނަށް ބަލައިގެން ކަމަށް އޭނާ ބުންޏެވެ. "ހައިވާން" ވެގެންދާނީ 2026 ވަނަ އަހަރު ބޮލީވުޑުން ފެނިގެންދާނެ އެންމެ ވަރުގަދަ އެއް ފިލްމަށެވެ.