ބޮލީވުޑްގެ މަޝްހޫރު ބަތަލާ ތާޕްސީ ޕައްނޫއަކީ ހަމައެކަނި ވިޔަފާރި އުސޫލުން ކާމިޔާބުވާނެ ފިލްމުތަކަށް ބެލުމުގެ ބަދަލުގައި، އަމިއްލަ ނަފްސަށް އޮންނަ އިތުބާރާއެކު އާދަޔާ ހިލާފު ރޯލުތައް އިހުތިޔާރުކުރާ ފަންނާނެއްގެ ގޮތުގައި އޭނާ އަމިއްލައަށް ސިފަކޮށްފިއެވެ.

ހިންދީ ސިނަމާގައި ތަފާތު މަގާމެއް ހޯދާފައިވާ ތާޕްސީ ވަނީ އޭނާގެ ކެރިއަރުގައި "ޕިންކް"، "ތައްޕަޅު"، "ބަދްލާ" އަދި "ހަސީން ދިލްރުބާ" ފަދަ އަންހެން ކެރެކްޓަރަށް ބިނާކޮށްފައިވާ ވަރުގަދަ ފިލްމުތަކެއް ކުޅެފައެވެ. އޭނާ ބުނި ގޮތުގައި ފިލްމެއްގައި ހަމައެކަނި ރީތި މަންޒަރެއްގެ ގޮތުގައި ފެންނަ "ފްލާވާޕޮޓް" ރޯލުތަކަށް އޭނާ ދުވަހަކުވެސް ޝައުގުވެރިކަމެއް ނުބަހައްޓައެވެ.

މިކަމާ ގުޅޭގޮތުން ވާހަކަދައްކަމުން ތާޕްސީ ބުނީ، އޭނާ އަމިއްލަ ނަފްސަށް އެންމެ ބޮޑު ކްރެޑިޓެއް ދެނީ ގިނަ ބަޔަކު ކުރަން ބިރުގަންނަ ފަދަ ރިސްކުތައް ނަގައި، އާދަޔާ ހިލާފު ވާހަކަތަކަށް ފުރުސަތު ދޭތީ ކަމަށެވެ. "އަހަރެން ކޮންމެ ފިލްމަކީ ކަރުދާހުގައި ލިޔެފައި އޮންނަ ގޮތުން ވިޔަފާރި ގޮތުން ކާމިޔާބުވާނެ އެއްޗަކަށް ވާކަށް ނުބަލަން. އަހަރެން ބަލަނީ އެއީ ރަނގަޅު އުފެއްދުމަކަށް ވާނެ ކަމަށް ގަބޫލުކޮށް، އަމިއްލަ ނަފްސަށް އޮތް އިތުބާރެއްގެ މަތިން އެ މަސައްކަތެއް ފަށަން،" ތާޕްސީ ކިޔައިދިނެވެ.

އޭނާ އިތުރަށް ފާހަގަކުރި ގޮތުގައި ފިލްމެއްގެ ކާމިޔާބީގައި ބެލުންތެރިން އެކްޓަރުންނަށް ތައުރީފު ކުރި ނަމަވެސް، މިއީ ފިލްމު އުފައްދާ ފަރާތްތަކާއި، ލިޔުންތެރިން އަދި މުޅި ޓީމުގެ ގުޅިފައިވާ މަސައްކަތެކެވެ. ނަމަވެސް، އިންޑަސްޓްރީގެ އާންމު އުސޫލުތަކާ ހިލާފު ސްކްރިޕްޓްތަކަށް އިތުބާރުކޮށް، އެފަދަ މަޝްރޫއުތަކަށް އެއްބާރުލުން ދިނުމަކީ އެކްޓަރުންގެ ޒިންމާއެއް ކަމަށް އޭނާ ގަބޫލުކުރެއެވެ.

ސޯޝަލް މީޑިއާއާ ދުރުގައި އަހަރެއްހާ ދުވަސް ހޭދަކުރުމަށްފަހު، ތާޕްސީ މިހާރު ވަނީ އަލުން ޑިޖިޓަލް ޕްލެޓްފޯމްތަކަށް އެނބުރި އައިސްފައެވެ. އެޗްޓީ ސިޓީއަށް ދިން އިންޓަވިއުއެއްގައި އޭނާ ބުނީ ސޯޝަލް މީޑިއާއާ ދުރުވީ އަމިއްލަ ސަބަބުތަކަށްޓަކައި ކަމަށާއި، މިހާރު އޭނާ ބޭނުންވަނީ ފޭނުން ބަލަން ބޭނުންވާ ފަދަ ކޮންޓެންޓްތައް ހިއްސާކުރަން ކަމަށެވެ. ނަމަވެސް، ސޯޝަލް މީޑިއާގެ ސަބަބުން ކުރިމަތިވާ ބައެއް އުންމީދުތަކާ މެދު އަދިވެސް އޭނާގެ ހިތުގައި ސުވާލުތަކެއް ހުރިކަން އޭނާ ފާހަގަކުރިއެވެ.