ބޮލީވުޑްގެ މަޝްހޫރު ދެ ތަރިން ކަމަށްވާ އަކްޝޭ ކުމާރާއި ސައިފް އަލީ ޚާން ގާތްގަނޑަކަށް ވިހި އަހަރަށްފަހު އެކުގައި ފެނިގެންދާ ފިލްމު "ހައިވާން" ގެ ފުރަތަމަ ޕޯސްޓަރުތައް ރަސްމީކޮށް ދައްކާލައިފިއެވެ.

އިއްޔެ އާންމުކުރި މި ޕޯސްޓަރުތަކުން ފެނިގެންދަނީ މި ދެ ތަރިންގެ ވަރަށް ތަފާތު އަދި ސަސްޕެންސް ފުން ސިފަތަކެކެވެ.

މަޝްހޫރު ޑައިރެކްޓަރު ޕްރިޔަދަރްޝަން އުފައްދާ މި ތުރިލާ ފިލްމަކީ އޭނާ 2016 ވަނަ އަހަރު ޑައިރެކްޓްކުރި މަލަޔާޅަމް ފިލްމު "އޮއްޕަމް" ގެ މައްޗަށް ބިނާކޮށް އުފައްދާ ފިލްމެކެވެ. ނަމަވެސް ޕްރިޔަދަރްޝަން ހާމަކޮށްފައިވާ ގޮތުގައި، މިއީ ހަމައެކަނި ރީމޭކެއް ނޫނެވެ. އޭގެ ބަދަލުގައި ހިންދީ ފިލްމަށް ބޮޑެތި ބަދަލުތަކެއް ގެނެސް، އާ އެލިމެންޓްތަކެއް ވަނީ ހިމަނާފައެވެ.

އަކްޝޭ ކުމާރު އޭނާގެ އިންސްޓަގްރާމް މެދުވެރިކޮށް ތިން ޕޯސްޓަރެއް ހިއްސާކުރަމުން ލިޔެފައިވަނީ، "އެއްވެސް ކަމެއް ނުފެނި ނުދާނެ، ހައިވާނިއްޔަތު ދެން ނުހުއްޓުވޭނެ" ކަމަށެވެ. ފުރަތަމަ ޕޯސްޓަރުން އަކްޝޭ ފެންނަނީ ކަޅުކުލައިގެ ތޮފިއެއް އަޅައިގެން، މޫނުގެ އެއްބައި ހިޔަނިވެފައި ހުއްޓައެވެ. މި ޕޯސްޓަރުގައި "ބަދަލުހިފުމަށް ހުރިހާ އެއްޗެއް ފެނޭ" ކަމަށް ބުނެފައިވެއެވެ. ދެވަނަ ޕޯސްޓަރުގައި ސައިފް އަލީ ޚާން ފެންނަނީ ވަރަށް ސީރިއަސްކޮށް ބަލަހައްޓައިގެން ހުއްޓައެވެ. އޭގައި ބުނެފައިވަނީ "ކޮންމެ އިހުސާސަކީ ހަތިޔާރެއް" ކަމަށެވެ. ތިންވަނަ ޕޯސްޓަރުން މި ދެ ތަރިން އެކުގައި ފެންނައިރު، ފަހަތުން ކުޑަކުއްޖެއްގެ ހިޔަނި ފެންނަން ހުރުމުން ފިލްމުގެ ވާހަކައިގެ ފުންމިން އިތުރަށް ހާމަވެގެންދެއެވެ.

މި ޕޯސްޓަރުތައް ފެނުމާއެކު އަކްޝޭ އާއި ސައިފްގެ ސަޕޯޓަރުން އަންނަނީ ސޯޝަލް މީޑިއާގައި ވަރަށް ބޮޑަށް ޝުއޫރު ފާޅުކުރަމުންނެވެ. ގިނަ ބަޔަކު ބުނަމުންދަނީ އަކްޝޭގެ މި ތަފާތު ސިފައަށް ވަރަށް އިންތިޒާރު ކުރެވޭ ކަމަށެވެ.

އަކްޝޭ އާއި ސައިފްގެ އިތުރުން ސައްޔާމީ ކޭރް ވެސް މުހިންމު ރޯލަކުން ފެނިގެންދާ "ހައިވާން" ސިނަމާތަކަށް އަންނާނީ ސެޕްޓެމްބަރު 11، 2026 ގައެވެ. މި ފިލްމަކީ ގިނަ ދުވަސްތަކެއްގެ މެދުކެނޑުމަކަށްފަހު އަކްޝޭ އާއި ސައިފްގެ ވަރުގަދަ ކުރިމަތިލުމެއް ފެނިގެންދާނެ ފިލްމެއް ކަމަށް ބެލެވެއެވެ.