ޔޫއެން އާންމު މަޖިލީހުގެ ޖަލްސާ ކުރިއަށް ދަނިކޮށް، ސީރިޔާގެ ރައީސް އަޙްމަދު އަލް-ޝަރާ އެމަނިކުފާނުގެ ފޯނުން އިންސްޓަގްރާމް ރީލްސް ބައްލަވަން އިންނެވި މަންޒަރު ފެންނަ ވީޑިއޯއެއް ސޯޝަލް މީޑިއާގައި އާންމުވެ، ބައިނަލްއަޤްވާމީ ސަމާލުކަމެއް ލިބިއްޖެއެވެ.

ނިއުޔޯކްގައި ހުންނަ ޔޫއެންގެ ބޭއްވުނު އާންމު މަޖިލީހުގެ ޖަލްސާގެ ތެރެއިން ކެމެރާއަށް އަރާފައިވާ މި ވީޑިއޯއިން ދައްކުވައިދެނީ، ތުރުކީގެ ރައީސް ރެޖެޕް ތައްޔިބު އުރުދުޣާން ދުނިޔޭގެ ޒަޢީމުންނާ މުޚާތަބު ކުރައްވައި ތަޤްރީރު ކުރައްވަމުން ގެންދެވި ވަގުތު، ސީރިޔާގެ ރައީސް އަލް-ޝަރާ އިސްޖައްސަވައިގެން އިންނަވައި ފޯނުން ރީލްސް ބައްލަވަމުންދިޔަ މަންޒަރެވެ.





އުރުދުޣާންގެ ތަޤްރީރުގައި ޣައްޒާގެ ހާލަތާއި ފަލަސްތީނުގެ ދައުލަތުގެ އިތުރުން ޔޫއެންގެ ސެކިއުރިޓީ ކައުންސިލް އިޞްލާޙުކުރުމާ ބެހޭގޮތުން މުހިންމު ވާހަކަފުޅުތަކެއް ދެއްކެވި ނަމަވެސް، ސީރިޔާގެ ޒަޢީމު އިންނެވީ ސޯޝަލް މީޑިއާ ބައްލެވުމުގައި މަޝްޣޫލުވެއެވެ.

މި ވީޑިއޯ އާންމުވުމާއެކު ސޯޝަލް މީޑިއާގެ ތަފާތު މަންސަތަކުގައި ގިނަ ބައެއްގެ ސަމާލުކަން މިއަށް ހުއްޓި، ތަފާތު ޝުޢޫރުތައް ވަނީ ފާޅުކޮށްފައެވެ.

ބައެއް ފަރާތްތަކުން މިއީ މަތީ ފަންތީގެ ބައްދަލުވުމެއްގެ ތެރެއިން ފެނުނު މަޖާ އަދި އާދައިގެ ކަމެއްގެ ގޮތުގައި ސިފަކުރިއިރު، އަނެއްބައި ފަރާތްތަކުން ވަނީ ދުނިޔޭގެ މުހިންމު ވެރިން ވާހަކަފުޅު ދައްކަވަމުން ގެންދެވި ވަގުތު އެފަދަ ގޮތަކަށް އަމަލުކުރެއްވުމުން ފާޑުކިޔާފައެވެ.

މިއީ މިއަހަރުގެ ޔޫއެން އާންމު މަޖިލީހުގެ ފެށުމުން ފެނިގެންދިޔަ އެންމެ މަޤްބޫލު އެއް "ވައިރަލް" މަންޒަރަށް ވަނީ ވެފައެވެ.