2000 ވަނަ އަހަރުގެ ސެޕްޓެމްބަރު މަހުގެ 30 ވަނަ ދުވަހަކީ ފަލަސްޠީނުގެ އިސްތިއުމާރީ ތާރީޚުގައި ހިތާމަވެރި އަދި ދުނިޔޭގެ ސަމާލުކަން ބޮޑުވެގެންދިޔަ ދުވަހެކެވެ.

އެ ދުވަހު ޣައްޒާގައި އިސްރާއީލުގެ އިސްތިއުމާރީ ބާރުތަކުން ދިން ބަޑީގެ ހަމަލާތަކުގައި ފަލަސްޠީނުގެ 12 އަހަރުގެ ކުޑަކުއްޖެއް ކަމަށްވާ މުޙައްމަދު އަލް ދުރާ ވަނީ ޝަހީދުކޮށްލާފައެވެ.

މި ހާދިސާގެ ތާރީޚީ އަދި އަސަރުގަދަ މަންޒަރުތައް ކެމެރާމަން ޠަލާލް އަބޫ ރަޙްމާ ވަނީ ރެކޯޑުކޮށްފައެވެ.

އެ ވީޑިއޯއިން ފެންނަނީ ފަލަސްޠީނުގެ ސެކިއުރިޓީ ބާރުތަކާއި އިސްރާއީލުގެ އިސްތިއުމާރީ ސިފައިންނާ ދެމެދު ހިނގަމުންދިޔަ ބަޑީގެ ހަމަލާތަކުގެ މެދުގައި ތާށިވެ، މުޙައްމަދު އަލް ދުރާ އޭނާގެ ބައްޕަ ޖަމާލް އަލް ދުރާއާއެކު ސިމެންތި ތަނބެއްގެ ނިވާކަން ވެގެން ތިއްބާއެވެ.

@aljazeeraenglish

It’s been 25 years since video of Israel’s killing of Palestinian boy Muhammad al-Durrah in Gaza was seen around the world. . The 12-year-old was shot as his father desperately tried to shield him from Israeli bullets during an uprising in the occupied territories. #news

♬ original sound - Al Jazeera English - Al Jazeera English

ބައްޕަ ޖަމާލް ވަނީ އޭނާގެ ދަރިފުޅު އިސްރާއީލު ސިފައިންގެ އުންޑަތަކުން ސަލާމަތްކުރުމަށްޓަކައި ހަށިގަނޑުން ނިވާކޮށް، ހިމާޔަތްކުރުމަށް ނުހަނު މަސައްކަތްކޮށްފައެވެ.

އިސްރާއީލު ސިފައިން ދެމުންދިޔަ އުންޑައިގެ ހަމަލާތަކުގައި ލިބުނު ފުރާނައަށް ނުރައްކާވި ޒަޚަމްތަކާއެކު، މުޙައްމަދު އަލް ދުރާ ނޭވާދޫކޮށްލީ އޭނާގެ ބައްޕަގެ އަތްމައްޗަށެވެ. މި ހަމަލާގައި ބައްޕަ ޖަމާލްގެ ހަށިގަނޑުގެ ތަފާތު އެކި ތަންތަނަށް ގިނަ އަދަދެއްގެ އުންޑައަރައި ސީރިއަސް އަނިޔާތަކެއް ލިބުނު ނަމަވެސް، އޭނާ ފުރާނަ ވަނީ ސަލާމަތްވެފައެވެ.

މި ހާދިސާއަކީ ފަލަސްޠީނުގެ ރައްޔިތުން އިސްރާއީލުގެ އިސްތިއުމާރާ ދެކޮޅަށް ކުރަމުންދާ ޖިހާދާއި ތަހައްމަލުކުރަމުންދާ އަނިޔާވެރިކަމުގެ ރަމްޒެއްގެ ގޮތުގައި މުޅި ދުނިޔެއަށް މަޝްހޫރުވެގެންދިޔަ ހާދިސާއެކެވެ.