ރަށެއްގައި ތިބޭ ފުލުހުންގެ އަދަދު މަދުވުމަކީ ރައްޔިތުންނަށް ދެވޭ ޚިދުމަތުގެ ފެންވަރު ދަށްވާންޖެހޭ ސަބަބެއް ނޫން ކަމަށާއި، ގިނަ ބަޔަކު ތިބެ ނަތީޖާ ނުނެރެވުމަށްވުރެ މަދު ބަޔަކު ތިބެގެން ރަނގަޅު ޚިދުމަތެއް ދިނުން މާ މުހިންމު ކަމަށް ކޮމިޝަނަރ އޮފް ޕޮލިސް އަޙްމަދު މުޙައްމަދު ވިދާޅުވެއްޖެއެވެ.

އދ. ކުނބުރުދޫގައި މިއަދު ބޭއްވި ރަސްމިއްޔާތެއްގައި އެ ރަށުގެ ޕޮލިސް ޕޯސްޓް ހުޅުވައިދެއްވައި ވާހަކަފުޅުދައްކަވަމުން ކޮމިޝަނަރ ވިދާޅުވީ، ކިތަންމެ މަދުން ފުލުހުން ތިބި ނަމަވެސް އެއީ ސަބަބެއް ކަމަށް ނުބަލައި، ރައްޔިތުންނާ ގާތް ގުޅުމެއް ބާއްވައިގެން ޚިދުމަތް ދިނުމަކީ މުހިންމު ކަމެއް ކަމަށެވެ.

"މަދު ފުލުހުންކޮޅެއް ތިބެގެން ރަނގަޅު، އެފިޝަންޓް، އިފެކްޓިވް މަސައްކަތެއް ކުރެވުނީމާ، ގިނަ ބަޔަކު ތިބެގެން ރައްޔިތުން އުއްމީދު ކުރާ ވަރަށް އެ މަސައްކަތް ނުކުރެވުން، އެއަށްވުރެ ރަނގަޅުވާނެ މަދު ބަޔަކު ތިބެގެން ރައްޔިތުންނަށް ރަނގަޅު ހިދުމަތެއް ދިނުން... އެހެންވީމަ އަޅުގަނޑު އެދެނީ، ކިތަންމެ މަދުން ފުލުހުން ތިބުން އެއީ ސަބަބެއް ކަމަށް ނުބަލައި، އެ ތިބޭ ފުލުހުން ގާނޫނާއި ގަވާއިދާ އެއްގޮތަށް ރައްޔިތުންނާ ދޭތެރޭ އޮންނަންޖެހޭ ގާތް ގުޅުން ބާއްވައިގެން، އަޅުގަނޑުމެންނާ ހަވާލުކޮށްފައިވާ މަސްއޫލިއްޔަތު އޭގެ އެންމެ އެދެވޭ ގޮތުގައި އަދާކުރަމުން ރައްޔިތުންނާ ގުޅިގެން މި މަސައްކަތް ކުރުމަށް،" ކޮމިޝަނަރ ވިދާޅުވިއެވެ.

ސީޕީ އިތުރަށް ވިދާޅުވީ، ރަށްރަށުގައި ރައްޔިތުންނަށް ޕްރޮފެޝަނަލް ޚިދުމަތެއް ފޯރުކޮށްދިނުމުގައި އެންމެ ބޮޑު އިސްކަމެއް ދޭންޖެހެނީ، ފުލުހުންގެ ކޮންސެޕްޓަށް ފަރުމާކުރެވިފައިވާ އަދި އެކަށީގެންވާ ވަސީލަތްތައް ހުރި މަރުކަޒުތަކެއްގައި ތިބެގެން މަސައްކަތްކުރުމަށް ކަމަށެވެ. އަދި ފުލުހުން ނެތް ރަށްރަށުގައި ފުރަތަމަ ފުލުހުން ޤާއިމުކުރުމަށްފަހު، މިހާރު ހިނގަމުންދަނީ އެ ރަށްރަށުގައި އަމިއްލަ މަރުކަޒުތައް ޤާއިމުކޮށް ފުރިހަމަ ޚިދުމަތެއް ދިނުމުގެ މަސައްކަތް ކަމަށް ވިދާޅުވިއެވެ.

މުއައްސަސާގެ ޖުމުލަ ސްޓްރެންތު އިތުރުވަމުންދާ ވަރަކަށް ކުނބުރުދޫ ޕޮލިސް ޕޯސްޓަށް ވެސް އިތުރު ފުލުހުންނާއި ވަސީލަތްތައް ހަމަޖައްސަވާނެކަން ހާމަކުރައްވަމުން ކޮމިޝަނަރ ވިދާޅުވީ، ޒަމާނީ ވަސީލަތްތަކާއެކު ރައްޔިތުންނަށް ދެވޭ ޚިދުމަތްތައް ފުޅާކުރުމަށް އަބަދުވެސް މަސައްކަތް ކުރައްވާނެ ކަމަށެވެ.