ދުބާއީން އިޒްރޭލަށް ދަތުރުކުރި ފްލައިދުބާއީގެ ފްލައިޓެއް ހައިޖެކްކޮށް ޓެރަރިސްޓް ހަމަލާއެއް ދޭން އުޅުނު ކަމުގެ ތުހުމަތުގައި، އެ އެއާލައިންގައި މަސައްކަތްކުރާ ދެ ދިވެއްސަކާ ސުވާލުކޮށްފިއެވެ.

174 ފަސިންޖަރުންނާއި 8 ކުރޫންނާއެކު ދުބާއީން އިޒްރޭލުގެ ތެލް އަވީވްއަށް ދަތުރުކުރި މި ފްލައިޓުގެ މައްސަލައިގައި ސުވާލުކުރި ދެ ދިވެހިންނަކީ ފްލައިދުބާއީގެ ވަޒީފާއާ ވަރަށް ފަހުން ގުޅުނު ދެ މުވައްޒަފުން ކަމަށް ސަރުކާރުން ވަނީ ކަށަވަރުކޮށްދީފައެވެ.

މިކަމާ ގުޅިގެން ސަރުކާރުގެ ތަރުޖަމާނު މުޙައްމަދު ހުސައިން ޝަރީފް (މުންދު) މައުލޫމާތު ދެއްވަމުން ވިދާޅުވީ، ދުބާއީން ދެ ދިވެހިންނާ ސުވާލު ކުރި ނަމަވެސް ހައްޔަރު ނުކުރާކަމަށެވެ. އަދި، އެ ދިވެހީންނާއި ބޯޓު ވައްޓާލަން އުޅުނު މައްސަލައާ އޮތް ގުޅުމެއް އަދި ޔަގީންވެފައި ނުވާ ކަމަށް ވެސް މުންދު ފާހަގަކުރެއްވިއެވެ.

މިމައްސަލައިގައި ޔޫއޭއީގެ ސަރުކާރާ ގުޅިގެން މަސައްކަތްތަކެއް ކުރެވެމުންދާ ކަމަށްވެސް އޭނާ ވިދާޅުވިއެވެ.

ފްލައިޓް ޓްރެކިން ޑޭޓާތަކުން ދައްކާ ގޮތުގައި، ބޯޓުން ފުރަތަމަ 7700 ގެ އިމަޖެންސީ ކޯޑު ފޮނުވުމަށްފަހު، އޭގެ ހަތް މިނެޓު ފަހުން ވަނީ ހައިޖެކްކުރުން ނުވަތަ ގަވާއިދާ ޚިލާފު އަމަލެއް ހިނގާކަން އަންގައިދޭ 7500 ގެ ކޯޑު ފޮނުވާފައެވެ. އަދި އެއާއެކު ގާތްގަނޑަކަށް 29 ސިކުންތުގެ ތެރޭގައި ބޯޓު ވަނީ 14،000 ފޫޓަށް ވެއްޓިފައެވެ.

މި ހާދިސާއާ ގުޅިގެން އިސްރާއީލުން ބުނެފައިވަނީ، ބޯޓުގެ މިސްރާބު ބަދަލުކޮށް ސައުދީ އަރަބިއްޔާއަށް ޖައްސަން ޖެހުނީ ބޯޓު ހައިޖެކްކޮށްގެން ނޫން ކަމަށާއި، އެއީ އެއްވެސް ސަލާމަތީ ނުރައްކަލެއް އޮތް ކަމެއް ނޫން ކަމަށެވެ. ނަމަވެސް، ޔޫއޭއީގެ ކަމާބެހޭ ފަރާތްތަކުން ހާމަކޮށްފައިވާ ގޮތުގައި، މިއީ ބޯޓު ވައްޓާލުމުގެ ނިޔަތުގައި ކޯޕައިލެޓް ދިން ހަމަލާއެއް ކަމަށާއި، މިއީ ޓެރަރިޒަމްގެ ނުރައްކާތެރި އަމަލެކެވެ.