ދިވެހިރާއްޖޭގެ ކޮންމެ ރައްޔިތަކަށް ފައިދާ ބަހާ ގޮތަށް ސަރުކާރުން 10 ރިސޯޓު ތަރައްޤީކުރުމަކީ، ރާއްޖޭގެ ފަތުރުވެރިކަމުގެ ދާއިރާއަށް އަންނާނެ ވަރަށް ބޮޑު އަދި އެދެވޭ ބަދަލެއް ކަމަށް ޓޫރިޒަމް ދާއިރާގެ އެންމެ ތަޖުރިބާކާރު އެއް ވިޔަފާރިވެރިޔާ އަދި ކްރައުން ކުންފުނީގެ ޗެއާޕާސަން ހުސައިން އަފީފު (ޗަމްޕާ އަފީފު) ވިދާޅުވެއްޖެއެވެ.

ރާއްޖޭގެ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުން އަފީފު ވިދާޅުވީ، ސަރުކާރުން އިއުލާންކޮށްފައިވާ ގޮތަށް 10 ރިސޯޓު ހަދައި އޭގެ ފައިދާ ރައްޔިތުންނަށް ފޯރުކޮށްދިނުމަކީ ދާއިރާއަށް އާ އުއްމީދެއް ގެނެސްދޭނެ ކަމެއް ކަމަށެވެ.

އަދި މި އުއްމީދީ މަޝްރޫއު ކާމިޔާބުވާނެ ކަމަށް ވަރަށް ބޮޑަށް އުންމީދު ކުރައްވާ ކަމަށާއި، މި ކަމުގައި އަމަލީ ގޮތުން ބައިވެރިވާން ވެސް ބޭނުންފުޅުވާ ކަމަށް އޭނާ ފާހަގަކުރެއްވިއެވެ.

އަފީފު އިތުރަށް ވިދާޅުވީ ރާއްޖޭގެ ފަތުރުވެރިކަން މިއަދު އޮތް ހިސާބަށް އާދެވުނީ ސަރުކާރާއި އަމިއްލަ ފަރާތްތަކުން ގުޅިގެން ކުރި ބުރަ މަސައްކަތުން ކަމަށެވެ. އަދި ކުރިއަށް އޮތް ތަނުގައި ވެސް ދާއިރާ އިތުރަށް ކުރިއަރުވައި ތަރައްޤީ ކުރެވޭނީ އެއްބާރުލުމާއެކު ކަމަށާއި، ވޭތުވެދިޔަ ތަނުގައި ދަސްވި ފިލާވަޅުތަކުގެ ބޭނުން ހިފުން މުހިންމު ކަމަށް އޭނާ ފާހަގަކުރެއްވިއެވެ.

ސަރުކާރުގެ ކުންފުންޏަކުން ކުރިއަށް އޮތް ތިން އަހަރުގެ ތެރޭގައި 10 ރަށެއް ރިސޯޓުގެ ގޮތުގައި ތަރައްގީކޮށް، އޭގެ ފައިދާއިން ކޮންމެ ދިވެހި ރައްޔިތަކަށް އަހަރަކު 400 ޑޮލަރު ދިނުމަށް ސަރުކާރުން ވަނީ ނިންމާފައެވެ.

މި އަހަރުގެ ފެބްރުއަރީ މަހު ރައްޔިތުންގެ މަޖިލީހުގައި ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ، މި މަޝްރޫއުގެ ދަށުން ހަދާ 10 ރިސޯޓުގެ ހިއްސާދާރުންނަކީ ދިވެހި ރައްޔިތުން ކަމުގައި ގާނޫނަކުން ހަމަޖައްސަވައިދެއްވާނެ ކަމަށް އިއުލާންކުރައްވާފައެވެ.