ކާރެއްގެ ތެރެއަށް ތުއްތު ކުއްޖަކަށް ހޮޑުލެވުނު ހާދިސާއަކާ ގުޅިގެން، ޓެކްސީ ޑްރައިވަރު 1500 ރުފިޔާއަށް ޑިމާންޑްކޮށް ގޯސްކޮށް އަމަލުކުރި ކަމަށް ބުނެ ސޯޝަލް މީޑިއާގައި ފަތުރަމުންދާ ވާހަކަތަކަކީ ހަގީގަތާ ހިލާފު ވާހަކަތަކެއް ކަމަށް ނަލަ ޓެކްސީ ސެންޓަރުން ހާމަކޮށްފިއެވެ.

ނަލަ ޓެކްސީ ސެންޓަރުން ނެރުނު ބަޔާނެއްގައި ބުނެފައިވަނީ، މި ހާދިސާ ހިނގާފައިވަނީ ހުޅުމާލެ ފޭސް 2 އިން މާލޭގެ 7 ނަންބަރު ޖެޓީއަށް އެ ސެންޓަރުގެ އެޕްލިކޭޝަން މެދުވެރިކޮށް ނެގި ދަތުރެއްގެ ތެރޭގައި ކަމަށެވެ. އެގޮތުން ބްރިޖް ލައިޓް ކައިރިން ތުއްތު ކުއްޖަކަށް ހޮޑުލެވުނު ވާހަކަ ކަސްޓަމަރު ބުނުމުން، ކޮތަޅު ހުންނާނެ ތަން ބުނެދީ، ޝީޓަށް ހޮޑުލެވިފައިވާތީ އާންމުކޮށް ޝީޓް ސާފުކޮށްދޭ ތަންތަނުން 1500 ވަރަކަށް ރުފިޔާ ނަގާ ވާހަކަ ޑްރައިވަރު ބުނެފައިވާ ކަމަށް ބަޔާނުގައިވެއެވެ.

މިކަމާ ގުޅިގެން، ކަސްޓަމަރު ފޯނުން އެހެން މީހަކާ ގުޅައި، އެމީހާ ބުނި ވަކި ތަނަކަށް ކާރު ސާފުކުރަން ދިއުމަށް އެދުމުން، ކަސްޓަމަރު ބޭނުންވި މަންޒިލަށް ގަޑިއަށް ގެންގޮސްދިނުމަށްފަހު ޑްރައިވަރު ވަނީ އެމީހާ ބުނި ތަނަށް ގޮސްފައެވެ. ނަމަވެސް އެތަނުން އެވަގުތު ސާފުކޮށްދެވެން ނެތުމުން، ޖެހިގެން ހުރި ތަނުން އަގު އަހައި، ފުރަތަމަ ބުނި 1600 ރުފިޔާގެ އަގު ވާހަކަ ދައްކައިގެން 1000 ރުފިޔާއަށް ޑްރައިވަރު ކުޑަކުރި ކަމަށްވެސް އެ ސެންޓަރުން ބުނެއެވެ.

ޓެކްސީ ސެންޓަރުން އިތުރަށް ބުނީ، މި ހުރިހާ ކަމެއް ހިނގަމުން ދިޔައިރުވެސް ޑްރައިވަރު ދިޔައީ ކަސްޓަމަރުގެ ފަރާތުން ފޯނުން ވާހަކަދެއްކި މީހާއަށް ގުޅައި މަޝްވަރާ ކުރަމުން ކަމަށެވެ. އަދި 1000 ރުފިޔާ ނަގާފައިވަނީ އެފަރާތުގެ ފުރިހަމަ އެއްބަސްވުމާ އެކުގައި ކަމަށާއި، ސާފުކުރުމުގެ މަސައްކަތް ކުރިއަށް ދިޔައިރު ފޮޓޯވެސް ހިއްސާ ކޮށްފައިވާނެ ކަމަށް ބަޔާނުގައިވެއެވެ.

މީގެއިތުރުން، ޝީޓް ސާފުކުރުމުގެ ހަރަދު ލިބުނު ނަމަވެސް، ކަސްޓަމަރު ކުރި ދަތުރުގެ އަގުވެސް ޑްރައިވަރަށް ލިބިފައިނުވާ ކަމަށް ސެންޓަރުން ބުނެއެވެ. ހަމައެއާއެކު ދެފަރާތުން ވާހަކަ ދައްކައިގެން ކަންކަން ހަމަޖެއްސުމަށްފަހު، ކަމުގެ ހަގީގަތް އޮޅޭގޮތަށް އަދި ޑްރައިވަރާއި ޓެކްސީ ސެންޓަރުގެ އަގު ވެއްޓޭގޮތަށް ސޯޝަލް މީޑިއާގައި މިފަދަ ދޮގު ވާހަކަތައް ފެތުރުމަކީ ނުހަނު ކަންބޮޑުވާ ކަމެއް ކަމަށް ނަލަ ޓެކްސީން ވަނީ ހާމަކޮށްފައެވެ.

ނަލަ ޓެކްސީން މިހެން ބުނެފައިވާއިރު، މި ހާދިސާ ސޯޝަލް މީޑިއާގައި ފޮޓޯތަކާއެކު ހިއްސާކޮށް ތުއްތު ކުއްޖާގެ މަންމަ ބުނެފައިވަނީ އުމުރުން އެއް އަހަރުގެ ކުއްޖާ ގޮަވައިގެން ކ. މާފުއްޓަށް ދާން ހުޅުމާލެއިން މާލޭގެ ޖެޓީ ނަމްބަރު 6 އަށް ނަލަ ޓެކްސީ މެދުވެރިކޮށް އެ ދަތުރު ނެގީ އިއްޔެ ހަވީރު 4:40 ހާއިރު ކަމަށެވެ. މާފުއްޓަށް ހަވީރު 5:15 ގެ ފެރީގައި ފުރަން ޓެކްސީގައި ޖެޓީއަށް ދަނިކޮށް ސިނަމާލެ ބްރިޖުން މާލެއަށް އަރަނިކޮށް އެއް އަހަރުގެ ކުއްޖާ ހޮޑުލާފާއިވަނީ އޭނާ އާއި ކުއްޖާގެ ގަޔަށް ކަމަށް މަންމަ ވަނީ ބުނެފައެވެ.

އަދި ދަރިފުޅަށް ހޮޑުލެވުމުން އެ ވާހަކަ ޓެކްސީ ޑްރައިވަރުގެ ގާތުގައި ބުނުމުން ފުރަތަމަ ޑިމާންޑް ކުރީ 1،500 ރުފިޔާއަށް ކަމަށާއި، ފަހުން 1،000 ރުފިޔާއަށް އެއަގު ކުޑަކުރުމުން އިއްޔެ އިރުއޮއްސުނު އިރު ޑްރައިވަރުގެ އެކައުންޓަށް 1،000 ރުފިޔާ ޖަމާކޮށްފައިވާ ކަމަށް ކުއްޖާގެ މަންމައާއި ޙަވާލާދީ މީޑިއާތަކުގައި ވަނީ ރިޕޯޓް ކޮށްފައެވެ.