އިމާރާތްކުރުމުގެ ގާނޫނުގެ ދަށުން އެކުލަވާލެވިފައިވާ ގަވާއިދުތަކަށް އާންމުންނާއި އެ ދާއިރާގައި މަސައްކަތްކުރާ ފަރާތްތައް އަހުލުވެރިކުރުމުގެ ގޮތުން ކުރިއަށްގެންދާ ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފިއެވެ.

ހައުސިން އަދި އިންފްރާސްޓްރަކްޗާ މިނިސްޓްރީން އިސްނަގައިގެން އޮންލައިންކޮށް ކުރިއަށްގެންދާ އެ ސެޝަންތަކުގެ މައިގަނޑު މަގުސަދަކީ އިމާރާތްކުރުމުގެ ގާނޫނާއި އެ އެ ގާނޫނުގެ ދަށުން ހެދިފައިވާ އެކިއެކި ގަވާއިދުތަކަށް އާންމު ރައްޔިތުންނާއި އިމާރާތްކުރުމުގެ ދާއިރާގައި ހަރަކާތްތެރިވާ އެންމެހާ ފަރާތްތައް ހޭލުންތެރިކުރުން ކަމަށް އެ މިނިސްޓްރީން ބުންޏެވެ.

އެ ސެޝަންތައް ކުރިއަށް ގެންދަން ނިންމާފައިވަނީ މި މަހުގެ 11އިން 15އިގެ ނިޔަލަށެވެ. އަދި މި ޕްރޮގްރާމުގައި ބައިވެރިވެވަޑައިގެންނެވުމަށް ޝައުގުވެރިވާ ފަރާތްތަކުން، ސެޝަން ފެށުމުގެ އެންމެ ލަސްވެގެން އެއްދުވަސް ކުރިން އޮންލައިން ފޯމު ފުރައި ރަޖިސްޓްރީކުރުމުގެ ފުރުސަތު މިހާރު ވަނީ ހުޅުވާލައިފަ އެވެ.

މި ޕްރޮގްރާމުގެ ތެރެއިން އިމާރާތްކުރުމުގެ މަސައްކަތްތަކާ ގުޅިގެން ނަގަންޖެހޭ އެކި ބާވަތުގެ ހުއްދަތައް ދިނުމުގެ މަރުހަލާތަކާއި، ކުރެހުން ފާސްކުރުމުގެ އުސޫލުތައް އަދި ގަވާއިދާ ޚިލާފުވާ ފަރާތްތަކާމެދު ފިޔަވަޅު އެޅުމުގައި އަމަލުކުރަން އޮންނަ ގޮތްތަކުގެ ތަފުސީލީ މައުލޫމާތު ފޯރުކޮށްދިނުމަށް ވަނީ ހަމަޖެހިފައެވެ.