ރައީސް އޮފީހުގެ ތަރުޖަމާނަކަށް މުޙައްމަދު މަބްރޫކް އަޒީޒް ހަމަޖައްސަވައިފިއެވެ.

މަބްރޫކް ކުރިން ހުންނެވީ ރައީސުލްޖުމްހޫރިއްޔާގެ އޮފީހުގެ އަންޑަ ސެކްރަޓަރީގެ މަގާމުގައެވެ. މި ސަރުކާރު ފެށުނީއްސުރެ، ރައީސް އޮފީހުގެ ތަރުޖަމާނުކަން ކުރައްވާފައިވާ އިބްރާހިމް ހޫދު ކުރެއްވި ޓްވީޓެއްގައި ވިދާޅުވީ، މިމަހުގެ 1ވަނަ ދުވަހުން ފެށިގެން ރައީސް އޮފީހުގެ ތަރުޖަމާނުގެ ގޮތުގައި ރައީސް ޞާލިޙު، މަބްރޫކް އައްޔަނު ކުރައްވާފައިވާ ކަމަށެވެ.

އޭގެ ކުޑައިރުކޮޅެއްގެ ފަހުން ރައީސް އޮފީހުގެ ތަރުޖަމާނުގެ ރަސްމީ ޓްވިޓާ ހޭންޑަލްގެ ނަން ވަނީ މަބްރޫކްގެ ނަމަށް ބަދަލުކޮށްފައެވެ.

Effective from 1 January 2021 President @ibusolih has appointed my colleague and friend @mabrouq as Spokesperson at @presidencymv.

— Mabrook Azeez (@MvSpokesperson) January 10, 2021

ހޫދު ވިދާޅުވެފައި ވަނީ މިއަދުން ފެށިގެން ދެން އޭނާ މަސައްކަތް ކުރައްވާނީ ރައީސް އޮފީހުގެ ޗީފް ކޮމިއުނިކޭޝަންސް ސްޓްރެޓެޖިސްޓް ކަމުގެ މަޤާމުގައި ކަމަށެވެ.

މަބްރޫކް ޢާއްމުންގެ މެދުގައި މަޤްބޫލުވެގެން ގޮސްފައިވަނީ، ރައީސް އޮފީހުގެ އަންޑަ ސެކްރަޓަރީ ކަމުގެ މަޤާމުގައި ހުންނެވިއިރު، ނޭޝަނަލް އެމަޖަންސީ އޮޕަރޭޝަންސް ސެންޓަރ (އެންއީއޯސީ) ގެ ތަރުޖަމާނުކަމުގައި ހުންނަވައިގެން ކޯވިޑް-19 ގެ މަޢުލޫމާތުތައް ރައްޔިތުންނަށް ގެނެސްދިނުމުގެ ސަބަބުންނެވެ.