ފުވައްމުލަކުގެ ލިންކް ރޯޑްގައި މީހުން ބުރުޖަހަން ނުކުތުން އިތުރުވުމާ ގުޅިގެން، ވަކި ވަގުތެއްގައި އެ މަގު ބަންދު ކުރުމަށް ނިންމައިފިއެވެ.

ފުވައްމުލަކު ސިޓީ ކައުންސިލުން ނެރުނު އިއުލާނެއްގައި ވަނީ މިއަދުން ފެށިގެން އެ ކައުންސިލުން ވަކި ގޮތެއް އަންގަންދެން ކޮންމެ ދުވަހެއްގެ ހަވީރު 16:00 ން ފެށިގެން މެންދަމު 00:00 އާ ހަމައަށް އެ ސިޓީގެ ލިންކް ރޯޑް ބަންދު ކުރަން ނިންމާފައިވާ ކަމަށެވެ. އަދި އެ ވަގުތުގައި އެ މަގު ބޭނުން ކުރެވޭނީ ފުލުހުން ހުއްދަ ދޭ ފަރާތްތަކަށް އެކަނި ކަމަށް ވެސް އިއުލާނުގައިވެއެވެ.

ޒަރޫރީ ބޭނުންތަކަށް ފިޔަވާ އެހެން ކަންކަމުގައި ގެއިން ބޭރަށް ނުކުތުން އެޗްޕީއޭ އިން ވަނީ މަނާކޮށްފައެވެ. އަދި ތިން މީހުންނަށް ވުރެ ގިނައިން މީހުން އެއް ނުވުމަށާއި އިޖްތިމާއީ ގައިދުރުކަން ބެހެއްޓުމަށް ވަނީ އިރުޝާދު ދެއްވާފައެވެ.

ރާއްޖޭގައި ކޯވިޑް-19 އަށް ޕޮޒިޓިވް 491 މީހުން މިހާތަނަށް ވަނީ ފެނިފައެވެ. އަދި އަތޮޅުތެރެއަށް ވެސް ވަނި ބަލި ފެތުރުފައެވެ.