ސަރުކާރުން ކަނޑައަޅާފައިވާ ރޭޓަށް ވުރެ ބޮޑުކޮށް ޓެކްސީ ކުރާނަމަ ލައިސެންސް ބާތިލްކުރާނެ ކަމުގެ އިންޒާރު ޓްރާންސްޕޯޓް މިނިސްޓްރީން ދީފިއެވެ.

މިނިސްޓްރީ އޮފް ޓްރާންސްޕޯޓް އެންޑް ސިވިލައިޒޭޝަނުން މިއަދު ނެރެފައިވާ ބަޔާނެއްގައި ބުނެފައިވަނީ ޓެކްސީ ޑްރައިވަރުންނާއި ޓެކްސީ ސެންޓަރުތަކުން އެމީހުންގެ ޑިމާންޑްތަކާއެކު ހުޅުމާލޭގައި އިހުތިޖާޖުކޮށް 11 މާރިޗު 2022 ވަނަދުވަހު ރޭގަނޑު ހުޅުމާލެއާއި މާލެއާއި ގުޅޭ ހަލިމަގުން ދަތުރު ނުކުރެވޭގޮތަށް މަގު ބަންދުވާނެފަދަ ގޮތަށް ޢަމަލުތައް ބަހައްޓާފައިވާ ކަމަށެވެ. އަދި އެކަމުގެ ސަބަބުން ޢާންމު ރައްޔިތުންނަށް ދެމުންއައި ޓެކްސީގެ ޚިދުމަތް މެދުކަނޑާލައިފައިވާތީ ޓެކްސީގެ ޚިދުމަތް ހޯދުމަށް ރައްޔިތުންނަށް ވަރަށްބޮޑެތި ދަތިތަކާ ކުރިމަތިލާންޖެހުނު ކަމަށް މިނިސްޓްރީން ވަނީ ބުނެފައެވެ.

މިނިސްޓްރީން ވަނީ ޓެކްސީ ގަވާއިދުގެ ދަށުން ކަނޑައަޅާފައިވާ އަގަށްވުރެ ބޮޑުއަގެއް ނުނެގުމަށާއި އަދި ޓެކްސީގެ ޚިދުމަތަށް ބުރޫ ނާރާނެގޮތަށް ޓެކްސީގެ ޚިދުމަތް ދިނުމަށް އިލްތިމާސް ކޮށްފައެވެ.

"ގަވާއިދުން ބާރުލިބިގެން ކަނޑައަޅާފައިވާ އަގަށް ވުރެ ބޮޑުއަގު ނަގާ ޓެކްސީ ޑްރައިވަރުންނާއި އަދި ޓެކްސީ ސެންޓަރުތަކާމެދު ޓެކްސީ ގަވާއިދުގެ 20 ވަނަ މާއްދާގެ ދަށުން ފިޔަވަޅު އަޅާނެ ކަމުގައި ދަންނަވަމެވެ." ޓްރާންސްޕޯޓްގެ ޤަވާއިދުގައިވެއެވެ.

ޓެކްސީ ޤަވާއިދުގެ 20 ވަނަ މާއްދާގައި ބުނެފައިވަނީ ގަވާއިދާ ޚިލާފަށް ޓެކްސީގެ ޚިދުމަތް ދިނުމަކީ ކުށެއް ކަމަށެވެ. އަދި މިފަދަ ކުށެއްކުރާ ފަރާތްތަކާއި ޓެކްސީ ސެންޓަރާއި ޑްރައިވަރުންގެ އަދަބަކީ ފުރަތަމަ ފަހަރަށްނަމަ ފަސް ސަތޭކަ ރުފިޔާއިން ޖޫރިމަނާކުރުމެވެ. އަދި ދެވަނަ ފަހަރުނަމަ އެއް ހާސް ރުފިޔާއިން ޖޫރިމަނާކުރާނެ ކަމަށާއި އަދި އިތުރަށް އެފަދަ ކުށެއް ތަކުރާރުކޮށްފިނަމަ އެފަރާތެއްގެ ލައިސަންސް ބާޠިލުކުރުމުގެ އިޚުތިޔާރު މިނިސްޓްރީއަށް ލިބިގެންވާ ކަމަށް ޤަވާއިދުގައި ވެއެވެ.

މިނިސްޓްރީގެ ބަޔާނުގައި އިތުރަށް ބުނެފައިވަނީ ޓެކްސީގެ ޚިދުމަތަކީ ރައްޔިތުންނާއި ގުޅުންހުރި އަސާސީ ޚިދުމަތަކަށްވެފައި ދުނިޔޭގެ ހުރިހާ ގައުމެއްގައިވެސް އަދި ދިވެހިރާއްޖޭގައިވެސް މި ޚިދުމަތަކީ ރެގިއުލޭޓް ކުރެވިގެން ދެވޭ ޚިދުމަތެއް ކަމަށެވެ. އަދި ޓެކްސީ ރަޖިސްޓަރީ ކުރުމާއި ޓެކްސީތަކަށް ހުއްދަ ދިނުމާއި ޓެކްސީ ދަތުރުތަކުގެ އަގު ކަނޑައެޅުމަކީ ޚިދުމަތް ހޯދާ ފަރާތާއި އަދި ޚިދުމަތް ލިބިގަންނަ ފަރާތުގެ ހައްގުތައް ހިމާޔަތް ކުރެވޭ ގޮތަށް ކަނޑައަޅާފައިވާ ކަމެއްކަމަށް މިނިސްޓްރީން ވަނީ ބުނެފައެވެ.

"ޓެކްސީ ޚިދުމަތުގެ އަގު ކަނޑައެޅުމަކީ ޓެކްސީތަކަށާއި ސެންޓަރުތަކަށް ގަވާއިދުގެދަށުން ލިބިގެންވާ ބާރެއް ނޫނެވެ." ބަޔާނުގައިވެއެވެ.

މިނިސްޓްރީން ބުނީ ތެލަށްއައި ބަދަލާއި ގުޅިގެން ޓެކްސީ ޑްރައިވަރުންގެ ފަރާތުން ޚިދުމަތުގެ އަގުތަކަށް ބަދަލުގެނައުމާއި ގުޅޭގޮތުން 16 ޓެކްސީ ސެންޓަރެއް ހިމެނޭގޮތަށް 7 މާރިޗް 2022 ވަނަދުވަހު ޓެކްސީ ޑްރައިވަރުންނާއި ޓެކްސީ ސެންޓަރުތަކުން ޓެކްސީގެ ޚިދުމަތުން އަގުނަގާނެގޮތާއި ގުޅޭގޮތުން މިނިސްޓްރީއަށް ސިޓީއެއް ހުށައަޅާފައިވާ ކަމަށެވެ.

އެހެންނަމަވެސް ޓެކްސީގެ ޚިދުމަތަކީ ހުރިހާ ރައްޔިތުންނާވެސް ގުޅި ލާމެހިފައިވާ އަސާސީ ޚިދުމަތަކަށްވެފައި ދެ ފަރާތުގެ ހައްގުތައް ހިމާޔަތް ކުރުމަކީ މިނިސްޓްރީގެ ޒިންމާއެއް ކަމަށާއި އަދި އަގު ކަނޑައެޅުމަކީ ޓެކްސީ ގަވާއިދު ގެ 15 ވަނަ މާއްދާގެ ދަށުން މިނިސްޓްރީއަށް ލިބިގެންވާ ބާރެއްކަމަށް ބަޔާނުގައިވެއެވެ.