އިދިކޮޅު ޕްރޮގްރެސިވް ޕާޓީ އޮފް މޯލްޑިވްސް ޕީޕީއެމްގެ އިޙްޔާ ފޯރަމް އޮންނާނީ މިރޭ ކަމަށް އެ ޕާޓީން ހާމަކޮށްފިއެވެ.

ޕީޕީއެމުން ބުނެފައިވަނީ ރަމަޟާންމަހުގެ ރޭތައް އިޙްޔާކޮށް ދިރުވުމުގެ ގޮތުން ޕީޕީއެމުން ބާއްވާ ޚާއްސަ ޖަލްސާ، މިރޭ 22:00ގައި ޕީޕީއެމް އޮފީހުގައި އޮންނާނެ ކަމަށެވެ. މިޖަލްސާގައި ދަރުސް ދެއްވާނީ އިސްލާމިކް އޯގަނައިޒޭޝަން ފޯ ކަލްޗަރ އެންޑް ސިވިލައިޒޭޝަންގެ ރައީސް ޑރ. މުޙައްމަދު ޝަހީމް ޢަލީ ސަޢީދު ކަމަށް ޕީޕީއެމުން ވަނީ ބުނެފައެވެ.

ރަމަޟާންމަހުގެ ރޭތައް އިޙްޔާ ކުރުމަށް ބާއްވާ މި ޖަލްސާގައި ޕީޕީއެމްގެ ލީޑަރ ކުރީގެ ރައީސް ޢަބްދުالله ޔާމީން ބައިވެރިވެ ވަޑައިގަންނަވާނެ ކަމަށް އެޕާޓީން ހާމަކޮށްފައިވެއެވެ.

"މި ޖަލްސާގައި ވީހާ ގިނަ ބޭފުޅުން ބައިވެރިވެ ވަޑައިގަތުމަށް ރައީސް ޔާމީން އެދިވަޑައިގަންނަވާ." ޕީޕީއެމުން ބުނެފައިވެއެވެ.

ޕީޕީއެމުން މީގެ ކުރިންވަނީ ރަމަޟާންމަހު ސަލްމާން މިސްކިތުގައި ދަރުހެއް ދިނުމަށްވެސް މަސައްކަތް ކޮށްފައެވެ. ނަމަވެސް އިސްލާމިކް މިނިސްޓްރީން ބުނެފައިވަނީ އެފުރުސަތު ދެވެން ނެތް ކަމަށެވެ. އަދި މިހާރު އެއްވެސް ސިޔާސީ ޕާޓީއަކަށް ދީނީ ދަރުސް ޕްރޮގްރާމް މިސްކިތްތަކުގައި ހިންގަން ފުރުސަތު ދޭގޮތަށް ހަމަޖެހިފައި ނުވާ ކަމަށް އިސްލާމިކް މިނިސްޓްރީން ވަނީ ބުނެފައެވެ.