އިލްމް އިންސްޓިޓިއުޓް ފޮރ އިސްލާމިކް ސްޓަޑީޒުން ކޮންމެ އަހަރަކު ވެސް ބާއްވަން ނިންމާފައިވާ ޤުރްއާން މުބާރާތް، ސުލްޠާން އިބްރާހިމް އިސްކަންދަރު (އެއްވަނަ) ގެ ނަމަށް ނިސްބަތް ކުރަން އެ އިންސްޓިޓިއުޓުން ނިންމައިފިއެވެ.

މިކަން ހާމަކޮށް އެ އިންސްޓިޓިއުޓުން މިއަދު ނެރުނު ބަޔާނެއްގައި ބުނެފައިވަނީ، އެ އިންސްޓިޓިއުޓުން އިންތިޒާމު ކުރާ މި މުބާރާތް ބާއްވަން ހަމަޖެހިފައިވަނީ ކޮންމެ ހިޖުރީ އަހަރެއްގެ ހައްޖުމަހުގެ ތެރޭގައި ކަމަށެވެ. އަދި މި މުބާރާތަކީ ޤުރްއާން ހިތުން ދަސްކޮށްގެން ކިޔެވުމަށް ހާއްސަ ކޮށްގެން ބާއްވާ މުބާރާތެއް ކަމަށް ވެސް އެ އިންސްޓިޓިއުޓުން މައުލޫމާތު ދެއެވެ.

އެ އިންސްޓިޓިއުޓުން ބުނީ، މި މުބާރާތް ސުލްޠާން އިބްރާހިމް އިސްކަންދަރު (އެއްވަނަ) ގެ ނަމަށް ނިސްބަތް ކުރަން ނިންމީ ސުލްޠާން އިބްރާހީމް އިސްކަންދަރަކީ ހުކުރު މިސްކިތް ބިނާކުރައްވައި އެތަނުގައި ދައުލަތުގެ ފަރާތުން ޤުރްއާން ކިޔަވައިދެއްވަން ނިންމެވި ރާއްޖޭގެ ކީރިތި މަހާރަދުން ކަމަށް ވެފައި އެމަހާރަދުންނަކީ ދިވެހިރާއްޖޭގައި އިސްލާމީ އުސޫލުތައް ދެމެހެއްޓުމަށް ގިނަގުނަ ހިދުމަތްތަކެއް ކޮށްދެއްވި ރަސްކަލަކަށްވުން ކަމަށެވެ.

މުބާރާތާއި ގުޅޭ އިތުރު މައުލޫމާތު ދެމުން އެފަރާތުން ބުނީ، މި މުބާރާތުގެ މުގައްރަރު ފަހުން ހާމަ ކުރާނެ ކަމަށާއި މި މުބާރާތް ހާއްސަ ކުރެވިފައިވަނީ އެ އިންސްޓިއުޓްގެ ދަރިވަރުންނަށް ކަމަށެވެ. އަދި މި މުބާރާތުގައި ޤުރްއާން ތަރުޖަމާއަށް ހާއްސަ ގޮތްޕެއް ވެސް ހިމެނޭއިރު އިލްމު އިންސްޓިޓިއުޓުގެ ބޭރުން އެނޫން އެހެން ފަރާތްތައް މުބާރާތުގައި ބައިވެރިކުރުމާމެދު މިހާރު ދަނީ މަޝްވަރާ ކުރެވެމުން ކަމަށް ވެސް އެ ފަރާތުން މައުލޫމާތު ދެއެވެ.

އިލްމު އިންސްޓިޓިއުޓަކީ ރާއްޖޭގައި އިސްލާމީ ތައުލީމު ކުރިއެރުވުމުގެ މަގުސަދުގައި ޑރ. މުޙައްމަދު ޝަހީމް ޢަލީ ސައީދު އިސްނަންގަވައިގެން އުފައްދަވާފައިވާ އިންސްޓިޓިއުޓެކެވެ. އެ އިންސްޓިޓިއުޓު ވުޖޫދުވިތާ މިވީ މަދު ދުވަސްކޮޅުގެ ތެރޭގައި ވެސް އެފަރާތުންވަނީ އިސްލާމީ ތައުލީމާއި ގުޅޭ ގިނަ ހިދުމަތްތަކެއް ކޮށްފައެވެ.