އެމް.ޓީ.ސީ.ސީ.އަކީ ހަވާލުކުރެވޭ މަސައްކަތްތައް ވަގުތަށް ނިންމައި، ރައްޔިތުންގެ އިތުބާރު ހޯދާފައިވާ ކުންފުންޏެއްކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވިދާޅުވެއްޖެއެވެ.

ރައީސުލްޖުމްހޫރިއްޔާ އިބްރާހީމް މުޙައްމަދު މިހެން ވިދާޅުވީ ރާއްޖެ ޓްރާންސްޕޯޓް ލިންކުގެ އެއްގަމު ދަތުރުފަތުރުގައި ބޭނުންކުރާ ބަސްތައް ތަޢާރުފްކުރުމުގެ ރަސްމިއްޔާތުގައި ރޭ ދެއްކެވި ވާހަކަފުޅުގައެވެ.

ރައީސް ޞާލިޙް ވިދާޅުވީ އެމަނިކުފާނު ސަރުކާރު ހިންގުމާ ހަވާލުވެ ވަޑައިގެންނެވިއިރުގައި، ހުޅުމާލޭގެ ޓްރާންސްޕޯޓް ޚިދުމަތް އޭރު ހަވާލުކޮށްފައި އޮތީ އެމް.ޕީ.އެލް.އާ ކަމަށާއި، ނަމަވެސް އޭރު މިޚިދުމަތް އެންމެ ރަނގަޅަށް ދެވޭނީ އެމް.ޕީ.އެލް.އަށް ކަމަށް ގަބޫލުފުޅު ނުކުރައްވާކަމަށެވެ. އަދި އެކަމަށް އެކަށީގެންވާ ކުންފުންޏެއް އޭރުވެސް ސަރުކާރުގައި އޮތްކަމަށާއި، ޓްރާންސްޕޯޓް މިނިސްޓަރު އެކަމަށް އިސްނަންގަވައި، ވަޒީރުންގެ މަޖިލީހުގައި މިކަމާ މަޝްވަރާ ކުރުމަށްފަހުގައި، ހުޅުމާލޭގެ ޓްރާންސްޕޯޓުގެ ހުރިހާ ކަމެއް އެމް.ޓީ.ސީ.ސީއާ ހަވާލުކުރީ އެ ސަބަބަށްޓަކައިކަމަށް ރައީސް ވިދާޅުވިއެވެ.

"އަޅުގަނޑު ވަރަށް ބޮޑަށް ޝުކުރު އަދާކުރަން މިއަދު އެމް.ޓީ.ސީ.ސީ.ގެ ހުރިހާ މުވައްޒަފުންނަށް. ޚާއްޞަކޮށް، ސީ.އީ.އޯ. އާދަމް ޢާޒިމަށް. ރާއްޖޭގެ އެކި ކަންކޮޅުތަކުގައި ދެމުން މިގެންދާ ދަތުރުފަތުރުގެ ނިޒާމަކީ، މިވަގުތު ރައްޔިތުން ހިތްހަމަޖެހޭ އިތުބާރުހިފޭގޮތަށް ދެވޭ ޚިދުމަތަކަށް އެމް.ޓީ.ސީ.ސީ ބަދަލުކޮށްފައިވަނީ. "ޓީމް އެމް.ޓީ.ސީ.ސީ."އަށް ވަރަށް ބޮޑަށް ޝުކުރިއްޔާ" ރައީސް ވިދާޅުވިއެވެ.

ރައީސް ސާލިހު ވިދާޅުވީ އެމް.ޓީ.ސީ.ސީ.އަކީ ރައްޔިތުންގެ އިތުބާރު ހޯދާފައިވާ ކުންފުންޏެއްކަމަށެވެ. އަދި ހަވާލުކުރެވޭ މަސައްކަތްތައް ވަގުތުން ވަގުތަށް ނިންމައި، އޭގެ ކޮލިޓީއާ އެކީގައި ރައްޔިތުން ބޭނުންވާގޮތަށް އަދި ސަރުކާރުން ބޭނުންވާ ދުވަހަށް، އެ މަސައްކަތް ނިންމަމުން ދަނީ، އެމް.ޓީ.ސީ.ސީ.އަކީ ޓީމެއްގެ ގޮތުގައި މަސައްކަތްކުރާ ކުންފުންޏަކަށްވާތީކަމަށް ރައީސް ވިދާޅުވިއެވެ.

ރައީސް ވިދާޅުވީ އާދަމް ޢާޒިމް އެމް.ޓީ.ސީ.ސީ.އާ ހަވާލުވިއިރުގައި އެތަނުގައި ތިބީ 1400 މުވައްޒަފުންކަމަށާއި އެކަށީގެންވާ ޕްރޮޖެކްޓްތަކެއް ނުހިނގާކަމަށެވެ. އެކަމަކު މިއަދު ރާއްޖޭގައި 300 އަށްވުރެ ގިނަ ޕްރޮޖެކްޓްތައް ހިނގަމުންދާއިރު، އޭގެ ބޮޑުބައި އެމް.ޓީ.ސީ.ސީން ހިންގަމުންދަނީ 3700 އަށްވުރެ ގިނަ މުވައްޒަފުންގެ މަސައްކަތުންކަން ރައީސް ފާހަގަކުރެއްވިއެވެ.

"އަޅުގަނޑަށް އެނގިފައި އޮތް ގޮތުންވިއްޔާ، މި އަހަރު ނިމޭއިރުގައި، ހަތަރުހާހަށްވުރެ ގިނަ މުވައްޒަފުން، އެމް.ޓީ.ސީ.ސީ.ގައި އެކިއެކި މަސައްކަތްތަކުގައި ޢަމަލީގޮތުން ބައިވެރިވާނެ. މިއީވެސް ރާއްޖެއަށް ލިބިގެންދާ ވަރަށްބޮޑު ކުރިއެރުމެއް ކަމުގައި އަޅުގަނޑު ދެކެން" ރައީސް ވިދާޅުވިއެވެ.

ރައީސް ވިދާޅުވީ ވަޒީފާ ބޭނުންވެފައި ތިބި އެތައް ޒުވާނުންނަކަށް އެކި ތަފާތު ވަޒީފާތައް އަދި ޓްރޭނިންގއާ އެކުގައި ދިނުމަށްފަހުގައި، އެމް.ޓީ.ސީ.ސީއިން ޚިދުމަތަށް ނެރެމުންދާކަމީ، އެމަނިކުފާނުގެ ހިތުން ހުރިހާ ރައްޔިތުންގެ އިތުބާރު އެމް.ޓީ.ސީ.ސީ.އަށް ލިބިގެންދާ ކަމެއްކަމަށެވެ.

"މި ފަށާ އެމް.ޓީ.ސީ.ސީ.ގެ ހުޅުމާލޭ ފޭސް 2ގެ ބަހުގެ ޚިދުމަތުގައިވެސް މުޅިން ދިވެހިން ބައިވެރިކުރާކަމީ، ޓްރޭނިންގ ލިބިފައި ތިބި އަދި އޭގެތެރޭގައި އަންހެނުންވެސް ހިމެނޭގޮތަށް، ވަޒީފާ އަދާކުރަމުންދާކަން އެއީ އަޅުގަނޑު ވަރަށް ހިތްހަމަޖެހޭ ކަމެއް. އެކަމަށްޓަކައި އެމް.ޓީ.ސީ.ސީ.އަށް އަދިވެސް އެއްފަހަރު އަޅުގަނޑު ޝުކުރު އަދާކުރަން" ރައީސް ވިދާޅުވިއެވެ.

ރައީސް ވިދާޅުވީ ހުޅުމާލެ ފޭސް 2 ތަރައްޤީ ކުރުމުގައި އަދިވެސް ކުރަންޖެހޭ ބައިވަރު ކަންތައްތައް އެބަހުރިކަމަށެވެ. އަދި އެތަނުގައި ދިރިއުޅޭ ރައްޔިތުންނަށް، މި ސަރަޙައްދުގެ ބީޗް ހިތްފަސޭހަކަމާ އެކީގައި ބޭނުންކުރެވޭނެ ގޮތަކަށް ބަދަލުކުރަންޖެހޭކަމަށާއި އެމް.ޓީ.ސީ.ސީ.ގެ ފަރާތުން މިހާރު އެތަން ތައްޔާރުކުރުމުގައި ޕްލޭނެއް އެކުލަވައިލައި، އަގުތައް ހޯދައި، ޢަމަލީގޮތުން މަސައްކަތް ފެށުމަށް ތައްޔާރުވެފައިވާކަމަށް ރައީސް ވިދާޅުވިއެވެ.

އެގޮތުން، ސްވިމިންގ ޓްރެކަކާއި، ހަޓްތަކާއި، އަދި ޕަބްލިކް ޓޮއިލެޓާއި، ޢާއިލާއާ އެކީގައި ގޮސް، ގޮނޑުދޮށުގައި ހަމަޖެހިލައިގެން ތިބެ ޗުއްޓީ ހޭދަކޮށްލެވޭ އިންތިޒާމުތަކެއް ރާވަމުންގެންދާކަމަށްވެސް ރައީސް ވިދާޅުވިއެވެ. އަދި މިއީ ހުޅުމާލޭ ފޭސް 2 ގައި މިހާރު ދިރިއުޅެމުންދާ ރައްޔިތުންނަށް އަދި އަންނަން ތިބި ރައްޔިތުންނަށް ލިބިގެންދާނެ ވަރަށްބޮޑު ފަސޭހައަކާއި އުފަލެއްކަމަށްވެސް ރައީސް ވިދާޅުވިއެވެ.