ހއ.އަތޮޅުގައި ފަށާފައިވާ ރާއްޖެ ޓްރާންސްޕޯޓް ލިންކުގެ ފެރީ ހިދުމަތުން މާދަމާއިން ފެށިގެން އަގު ނަގަން ފެށި ނަމަވެސް، ތުއްތު ކުދިންނާއި ހާއްސަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެކަމަށް ސަރުކާރުން ހާމަކޮށްފިއެވެ.

ރާއްޖެ ޓްރާންސްޕޯޓް ލިންކުގެ ފެރީގެ ހިދުމަތަށް އަހުލުވެރިކުރުމަށް މިދިޔަމަހުގެ 26 ވަނަ ދުވަހުން ފެށިގެން އެމްޓީސީސީން ހއ. އަތޮޅުގައި އެ ހިދުމަތް ފޯރުކޮށްދެމުން ދިޔައީ އަގަކާއި ނުލައެވެ.

ޕްލޭނިންގ މިނިސްޓްރީން މިއަދު ނެރުނު އިއުލާނެއްގައި ބުނެފައިވަނީ މާދަމާއިން ފެށިގެން ރާއްޖެ ޓްރާންސްޕޯޓް ލިންކުގެ ހިދުމަތް ރަސްމީކޮށް ހއ.އަތޮޅުގައި ފަށާއިރު އަގު ނަގާނޭކަމަށެވެ. ނަމަވެސް ތުއްތު ކުދިންނާއި ހާއްސަ އެހީއަށް ބޭނުންވާ ފަރާތްތަކަށް ހިލޭ ދަތުރުކުރެވޭނެކަމަށް އިއުލާނުގައިވެއެވެ.

މިނިސްްޓްރީން ބުނީ މި ދަތުރުތަކުގެ ޓިކެޓް އާރުޓީއެލްގެ ވެބްސައިޓް އަދި މޯބައިލް އެޕްލިކޭޝަން މެދުވެރިކޮށް ލިބޭނެކަމަށެވެ.

ރާއްޖެ ޓްރާންސްޕޯޓް ލިންކް (އާރް.ޓީ.އެލް) ގެ ޚިދުމަތް ހއ. އަތޮޅުގައި ރަސްމީކޮށް ފެށުން

ނޫސް ބަޔާން:https://t.co/Lgmd5YQxW3

އަގުތައް: https://t.co/0idCfsZiRz

— Min.of National Planning, Housing & Infrastructure (@MoNPHImv) July 2, 2022

ހައި ސްޕީޑް ފެރީގެ ޚިދުމަތްދޭ އާރުޓީއެލް ފެރީގެ ނިޒާމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙުގެ ރިޔާސީ ވައުދެކެވެ. އެ ހިދުމަތް ރާއްޖޭގައި ފޯރުކޮށްދިނުމަށް ސަރުކާރުން ހަވާލުކޮށްފައިވަނީ އެމްޓީސީސީއާއެވެ.

ރާއްޖެ ހައި ސްޕީޑް ފެރީ ވިއުގައަކުން ގުޅާލުމަށް ސަރުކާރުން ފަރުމާކޮށްފައިވާ "އިންޓަރގްރޭޓެޑް ނޭޝަނަލް ޕަބްލިކް ފެރީ ނެޓްވޯރކް" މަޝްރޫޢުގެ ފުރަތަމަ ފިޔަވަހީގެ ދަށުން "ރާއްޖެ ޓްރާންސްޕޯޓް ލިންކް"ގެ ޚިދުމަތް މިދިޔަމަހު ފުރަތަމަ ފަށާފައިވަނީ ޒޯން އެކަކަށެވެ. ޒޯން 1 ގައި ހިމެނެނީ ރާއްޖޭގެ އެންމެ އުތުރުން ހއ.، ހދ. އަދި ށ. އަތޮޅުގެ ރަށްތަކެވެެ.