އިންޑިގޯއިން އިންޑިއާގެ އިތުރު 2 ސިޓީއަކާއި ރާއްޖެއާއި ދެމެދު ޝެޑިއުލް ދަތުރުތައް ފަށަން ތައްޔާރުވެއްޖެއެވެ.

ނޮވެމްބަރ 1 ވަނަ ދުވަހުން ފެށިގެން އިންޑިގޯއިން ރާއްޖެއަށް ޝެޑިއުލް ދަތުރުތައް ފެށުމަށް ހަމަޖެހިފައިވާ އިންޑިއާގެ ދެ މަންޒިލަކީ ޗެންނާއީ އާއި ހައިދަރުއާބާދެވެ. އިންޑިގޯއިން މިހާރު ދަނީ ބެންގަލޫރާއި މުންބާއިން ރާއްޖެއަށް ޝެޑިއުލް ދަތުރުތައް ކުރަމުންނެވެ.

އިންޑިގޯގެ ދަތުރުތައް ޗެންނާއީން މާލެއަށް އޮންނާނީ އަންގާރަ، ބުރާސްފަތި އަދި ހޮނިހިރު ދުވަހުއެވެ. އަދި ހައިދަރުއާބާދުން ރާއްޖެއަށް ދަތުރު ކުރާނީ ހޯމަ، ބުދަ، ހުކުރު އަދި އާދިއްތަ ދުވަހުއެވެ.

އިންޑިގޯއިން ރާއްޖެއަށް ޝެޑިއުލް ދަތުރުތައް ފުރަތަމަ ފަށާފައިވަނީ 2018 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހުއެވެ. އަދި ކޯވިޑް-19 އަށްފަހު އިންޑިގޯގެ ދަތުރުތައް ރާއްޖެއަށް އަލުން ފަށާފައިވަނީ 2020 ވަނަ އަހަރުގެ ސެޕްޓެމްބަރު މަހުއެވެ.

އިންޑިއާއަކީ ރާއްޖެއަށް މިހާރު އެންމެ ގިނައިން ފަތުރުވެރިން އަންނަ ޤައުމެވެ. އަދި އިންޑިއާ އަކީ އެކިއެކި ބޭނުންތަކުގައި ގިނަޢަދަދެއްގެ ދިވެހިންވެސް ޢާއްމުކޮށް ދަތުރުކޮށްއުޅޭ ޤައުމެކެވެ.