އަންނަ އަހަރުގެ ތެރޭގައި ހުވަދު އަތޮޅުގައި ހައި ސްޕީޑް ފެރީގެ ޚިދުމަތް ފަށާނެކަމަށް މިނިސްޓަރ އޮފް ނޭޝަނަލް ޕްލޭނިން ހައުސިން އެންޑް އިންފްރާރ ސްޓްރަކްޗަރ މުޙައްމަދު އަސްލަމް ވިދާޅުވެއްޖެއެވެ.

މިނިސްޓަރ އަސްލަމް މިހެން ވިދާޅުވީ، އެމްޓީސީސީގެ "ބޮޑު ޖައްރާފާ" އިފްތިތާހްކުރުމަށާއި ގއ. ދާންދޫ ބިންހިއްކުމުގެ ޢަމަލީ މަސައްކަތް ފެށުމުގެގޮތުން ބޭއްވި ރަސްމިއްޔާތުގައި ވާހަކަދައްކަވަމުންނެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރ އަސްލަމް ވިދާޅުވީ ސަރުކާރުގެ އަމާޒަކީ މުޅި ރާއްޖެ ދަތުރު ފަތުރުގެ ނިޒާމްމުން ގުޅާލުންކަމަށާއި، މިހާރު ފަށާފައިވާ ފެރީގެ ހިދުމަތަށްވެސް ބޮޑު ތަރުހީބެއް ލިބެމުންދާކަމަށެވެ. އެގޮތުން އުތުރުގައި ފަށާފައިވާ އާރުޓީއެލް ފެރީގެ ހިދުމަތް މިހާތަނަށް ބައިލައްކައަށްވުރެ ގިނަ މީހުން ހޯދާފައިވާކަން މިނިސްޓަރ ފާހަގަކުރެއްވިއެވެ.

މިނިސްޓަރ ވިދާޅުވީ އާރުޓީއެލް ހިދުމަތް މުޅި ރާއްޖެއަށް ފުޅާކުރުމަށް ސަރުކާރުން މަސައްކަތްކުރަމުންދާއިރު އަންނަ އަހަރުގެ ސެޕްޓެމްބަރުމަހުގެ ތެރޭގައި ހައި ސްޕިޑް ފެރީގެ ޚިދުމަތް ހުވަދު އަތޮޅުގައި ފައްޓަވާނެކަމަށެވެ.

އަސްލަމް ވިދާޅުވީ ސަރުކާރުގެ ވިސްނުމަކީ ރަށްތައް ތަރައްޤީކޮށް އެރަށަކުން ޚިދުމަތް ލިބި އެހެން ރަށްރަށުގެ މީހުންވެސް އެ ރަށްތަަކަށް ދެވޭނެ އިންތިޒާމް ހަމަޖެއްސުންކަމަށެވެ.

"ރާއްޖެ ޓްރާންސްޕޯޓް ލިންކް"ގެ ޚިދުމަތް ފަށާފައިވަނީ ޖޫންމަހުގެ 12 ވަނަ ދުވަހުއެވެ. ރާއްޖެ ޓްރާންސްޕޯޓް ލިންކަކީ، ޖަޒީރާ ރާއްޖޭގެ ރަށްތައް ލުއިފަސޭހަ ދަތުރުފަތުރުގެ ނިޒާމަކުން ގުޅާލުމަށް، ސަރުކާރުން މުޅިން އަލަށް ތަޢާރަފުކުރި ހައި ސްޕީޑް ފެރީ ނިޒާމެކެވެ.