މިނީ ބަހުގެ ހިދުމަތް ފަށައިގެން ފުރަތަމަ 2 ހަފްތާ ނިމުނުއިރު، ލައްކައަކަށްވުރެ ގިނަ މީހުން މިނީ ބަހުގެ ހިދުމަތް ހޯދާފައިވާކަމަށް ތަފާސް ހިސާބުތަކުން ދައްކައިފިއެވެ.

އެމްޓީސީސީން މާލޭގައި މިނީ ބަހުގެ ހިދުމަތް ފަށާފައިވަނީ މިމަހުގެ 2 ވަނަ ދުވަހުއެވެ.

އެމްޓީސީސީން ދައުލަތުގެ މީޑިއާއަށް ދީފައިވާ މައުލޫމާތުތަކަށް ބަލާއިރު، ފުރަތަމަ ދެ ހަފްތާގައި މިނީ ބަސް ބޭނުންކުރި މީހުންގެ އަދަދު ވަނީ 106،000 އަށް އަރާފައެވެ.

އެމްޓީސީސީން ބުނީީ ބަހުގެ ޚިދުމަތުގެ ފުރަތަމަ ދެހަފްތާގައި އެންމެ ގިނަ މީހުން ދަތުރުކޮށްފައިވަނީ އޯކިޑް ރޫޓުން ކަމަށެވެ. ދެވަނައަށް އެންމެ ގިނަ މީހުން ދަތުރުކޮށްފައިވަނީ އަމީނީ ރޫޓުންނެވެ.

އޯކިޑް ރޫޓު ގިނަ މީހުން ބޭނުންކުރަނީ ސަރުކާރުގެ އެކި އޮފީސްތައް ހުންނަ ސަރަޙައްދުގައި އެރޫޓު ހިމެނޭތީކަމަށް އެމްޓީސީސީން ބުނެއެވެ.

އެމްޓީސީސީން ފުރަތަމަ ނިންމާފައި އޮތީ މިނީ ބަހުގެ ޚިދުމަތުގެ ފުރަތަމަ ދެހަފްތާގައި ހިލޭ ދަތުރުތައް ކުރުމަށްފަހު ތިންވަނަ ހަފްތާއިން ފެށިގެން ފައިސާ ނަގަން ފެށުމަށެވެ. ނަމަވެސް އެ ނިންމުން ބަދަލުކޮށް އިތުރު 2 ހަފްތާއަށް ހިލޭ ބަހުގެ ޚިދުމަތް ދިނުމަށް މިހާރު ވަނީ ނިންމާފައެވެ.

އެމްޓީސީސީން މިގޮތަށް ނިންމީ ބަހުގެ ޚިދުމަތުގައި ފައިސާ ދެއްކުމަށް ބޭނުންކުރާ އިލެކްޓްރޯނިކް ވަޞީލަތްތަކަށް ޢާއްމުން އަހުލުވެރިވުމަށް އިތުރު ފުރުސަތެއް ދިނުމަށެވެ.