ޅ.އަތޮޅުގައި މިހާރު ފަށާފައިވާ ރާއްޖެ ޓްރާންސްޕޯޓް ލިންކް (އާރުޓީއެލް) ލޯންޗު ފެރީގެ ޚިދުމަތުން އަންނަ ހަފްތާއިން ފެށިގެން އަގު ނަގާނެކަމަށް ސަރުކާރުން ހާމަކޮށްފިއެވެ.

ހައިސްޕީޑް ފެރީގެ ނިޒާމަކުން މުޅި ރާއްޖެ ގުޅާލުމަށް ރައީސް ޞާލިޙް ވެވަޑައިގެންނެވި ވައުދާއި އެއްގޮތަށް، ޅ. އަތޮޅުގައި ޚިދުމަތްދޭން ފަށާފައިވަނީ މިދިޔަ ނޮވެމްބަރު މަހުގެ 17 ވަނަ ދުވަހުން ފެށިގެންނެވެ.

ޕްލޭނިން މިނިސްޓްރީން ބުނީ އާބާދީގައި ގާތްގަނޑަކަށް 11،000 މީހުން ދިރިއުޅޭ ޅ. އަތޮޅަށް ހިލޭ ދޭންފެށި ޚިދުމަތް ނިމުމަކަށް ގެނަސް، އަންނަ އާދިއްތަ ދުވަހުން ފެށިގެން އަގު ނަގައިގެން ދަތުރުތައް ފަށަން ނިންމާފައިވާ ކަމަށެވެ.

ޅ. އަތޮޅުގެ ދަތުރުތައް ތިން ރޫޓަކަށް ބަހާލާފައިވާއިރު އޭގެތެރެއިން އެއްރޫޓު ހާއްސަކޮށްފައިވަނީ އެއާޕޯޓުގެ ދަތުރުތަކަށެވެ. ޅ.އަތޮޅުގައި އާރުޓީއެލް ދެ ލޯންޗު ބޭނުންކުރާއިރު ދަތުރުތައް ފަށާނީ ކޮޅަކަށް 35ރ. އާއި 125ރ. ދެމެދުގެ އަގުތަކަކުންނެވެ.

ސަރުކާރުން މިހާތަނަށް އާރުޓީއެލްގެ ޚިދުމަތް ފަށާފައިވަނީ ހއ. އަދި ހދ. ގެ އިތުރުން ށ. އަތޮޅުގައެވެ.