އެރިޓްރިއާގައި ހިފަހައްޓާފައިވާ ފިއުލް ސަޕްލައި މޯލްޑިވްސް (އެފްއެސްއެމް) ގެ ދެ ބާޖުގެ ދިވެހި ފަޅުވެރިން ރާއްޖެއަށް ގެނެސްފިއެވެ.

މަޢުލޫމާތު ލިބިފައިވާ ގޮތުގައި ޚާރިޖީ ވުޒާރާގެ އެހީތެރިކަމާއެކު އެ ދެބާޖުގައި ތިބި ދިވެހި ފަޅުވެރިން ރާއްޖެއަށް ގެނެސްފައިވަނީ ހުކުރުދުވަހުއެވެ. އެދެބާޖުގައި ތިބި މިސްރު ފަޅުވެރިން ވަނީ މިސްރަށް ފޮނުވާލާފައެވެ.

މި ބާޖުތައް ހިފަހައްޓާފައިވަނީ މޫސުން ގޯސްވެގެން އެރިޓްރީއާގައި ބަނދަރުކުރުމުންނެވެ. އަދި އެފްއެސްއެމްގެ ދެ ބާޖުގައި 4 ދިވެހިންނާއި 4 މިސްރު މީހުން ތިއްބެވެ. އެފްއެސްއެމްގެ ދެބާޖާއިއެކު ޕެޓްރޯލިއަމް ލިންކް ޕްރައިވެޓް ލިމިޓެޑްގެ ބާޖެއްވެސް އެރިޓްރިއާގައި މިދިޔަ މަހުގެ 26 ވަނަ ދުވަހު ހިފެހެއްޓިއެވެ.

އެރިޓްރިއާގައި ހިފަހައްޓާފައިވާ އެފްއެސްއެމްގެ ދެ ބާޖަކީ 180،000 ލީޓަރުގެ ޑީސަލާއި 40،000 ލީޓަރ ޕެޓްރޯލާއި 60،000 ލީޓަރުގެ ޕެޓްރޯލް ރައްކާކުރެވޭނެ ކެޕޭސިޓީ ހުރި ދެބާޖުކަމަށް އެފްއެސްއެމުން މަޢުލޫމާތުދެއެވެ.

ފަޅުވެރިން ރާއްޖެއަށް ގެނައި ނަމަވެސް ބާޖުތައް ރާއްޖެއަށް ނުގެނެވޭކަމަށް އެފްއެސްއެމުން މަޢުލޫމާތުދެއެވެ.

އެ ބާޖުތަކަކީ 2019 ވަނަ އަހަރު އެފްއެސްއެމުން ބަންނަން ޙަވާލުކުރި 4 ބާޖުގެ ތެރެއިން ދެބާޖެވެ. މިސްރުގެ ކުންފުންޏަކާއި ހަވާލުކޮށްގެން ބަންނަމުން ދިޔަ 4 ބާޖުގެ ތެރެއިން ދެ ބާޖު މިދިޔަ ރޯދަމަހުގެ ފަހުކޮޅުވަނީ ރާއްޖެއަށް ގެނެސްފައެވެ..

އެފްއެސްއެމްގެ ފްލީޓްގައި ޖުމްލަ 20 ބާޖު އޮވެއެވެ.