އިމާމުންނާ ޚަޠީބުންނަށް އިތުރު ތަމްރީނު ދިނުމަށްޓަކައި ސަރުކާރުން ފަށާފައިވާ މަސައްކަތުގެ ދަށުން ރާއްޖޭން ބޭރުން ތަމްރީނު ހޯދާ އިމާމުންނާއި ޚަޠީބުންގެ ފުރަތަމަ ބެޗް މިއަދު ސަޢުދީ ޢަރަބިއްޔާ އަށް ފުރައިފިއެވެ.

އިސްލާމިކް މިނިސްޓްރީން ބުނީ، އިމާމުންނާއި ޚަޠީބުންނަށް ރާއްޖޭން ބޭރުން އިތުރު ތަމްރީނު ދިނުމުގެ ފުރުޞަތުގެ ދަށުން މިއަދު ސަޢުދީއަށް ފުރި ބައިވެރިން މައްކާ އާއި މަދީނާގެ ޚާއްސަ ތަންތަނަށް ޒިޔާރަތްކުރާނެ ކަމަށެވެ.

އިމާމުންނާއި ޚަޠީބުންނަށް ރާއްޖޭން ބޭރުން އިތުރު ތަމްރީނު ދިނުމުގެ ދެވަނަ ބުރުގައި ހިމެނޭ ބައިވެރިން ފުރުމަށް ހަމަޖެހިފައިވަނީ އަންނަ ޝައްވާލު މަހުގައި ކަމަށް އިސްލާމިކް މިނިސްޓްރީން މަޢުލޫމާތުދެއެވެ. މިއަހަރު އިމާމުންނާއި ޚަޠީބުން، ސައުދީގެ އިތުރުން މިޞްރު، މެލޭޝިޔާ، ބުރޫނާ، އިންޑޮނޭޝިޔާއަށް ވެސް ތަޖުރިބާއާއި ތަމްރީނުގެ ދަތުރުކުރުމަށް ވަނީ ހަމަޖެހިފައެވެ.

އިމާމުން ތަމްރީންކުރުމަށް ކުރިއަށްގެންދާ ޕްރޮގްރާމަކީ އިމާމުކަމުގެ ދާއިރާއިން އިމާމުންނަށް އިންޓެންސިވް ތަމްރީން ފޯރުކޮށްދީ މި ޒަމާނުގައި އިމާމުންނަށް ބޭނުންވާ، މިސްކިތްތަކާ ގުޅޭ އިތުރު މަޢުލޫމާތު ފޯރުކޮށްދިނުމަށް ކުރިއަށް ގެންދާ ޕްރޮގްރާމެއް ކަމަށް އިސްލާމިކް މިނިސްޓްރީން މަޢުލޫމާތު ދެއެވެ.

ތަޖުރިބާއާއި ތަމްރީން ދަތުރުތަކުގެ އިތުރުން މިހާރު މާސްޓަރސް ހަދާފައިވާ އިމާމުންނަށް ޕީއެޗްޑީއަށް ކިޔެވޭނެ އިންތިޒާމު ހަމަޖެއްސުމަށް ވެސް ސަރުކާރުން ވަނީ މަޝްރޫއެއް ކުރިއަށް ރޭވިފައިވާކަން އިއުލާނު ކޮށްފައެވެ.

އިސްލާމިކް މިނިސްޓްރީން ބުނީ، ސަރުކާރުގެ އަމާޒަކީ މި އަހަރުގެތެރޭ 700 އިމާމުން ތަމްރީނު ކުރުން ކަމަށެވެ.