އިސްލާމިކް ޔުނިވާސިޓީ ހިންގަން ހުޅުމާލެއިން ބޮޑު ބިމެއް ހަމަޖައްސައިފި އެވެ.

އިސްލާމިކް ޔުނިވާސިޓީއަށް 45 އަހަރު ފުރުމާ ގުޅިގެން ބޭއްވި ހާއްސަ ހަފްލާގައި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އެކްސްގައި ވިދާޅުވީ އިސްލާމީ ޔުނިވަރސިޓީ ހިންގުމަށް އެކަށީގެންވާ އާ އިމާރާތެއް އެޅުމަކީ ރައީސް ޑރ މުހައްމަދު މުއިއްޒުގެ ސަރުކާރުގެ އަމާޒެއް ކަމަށެވެ.

އަދި އެކަމަށްޓަކައި 35 ހާސް އަކަފޫޓްގެ ބިމެއް މިހާރު ވަނީ ހުޅުމާލެއިން ހަމަޖައްސަވާފައިވާ ކަމަށް ޝަހީމް ވިދާޅުވިއެވެ.

މިނިސްޓަރު އިތުރަށް ވިދާޅުވީ ރާއްޖެއިން ބޭރުގެ ދަރިވަރުން ވެސް ތައުލީމު ހާސިލުކުރަން އިސްލާމިކް ޔުނިވާސިޓީއަށް ގެނައުމަކީ އެ ޔުނިވާސިޓީގެ އަމާޒެއް ކަމަށެވެ.

މިނިސްޓަރު އިތުރަށް ވިދާޅުވީ އިސްލާމިކް ޔުނިވާސިޓީއަށް އޮތީ ވަރަށް އުޖާލާ މުސްތަޤްބަލެއް ކަމަށާއި، އެންމެ އުއްމީދު ކުރާ ދުވަހަކީ އައިޔޫއެމްއަކީ ބައިނަލްއަޤްވާމީ ގޮތުން ފާހަގަކޮށްލެވޭ އިސްލާމިކް ޔުނިވާސިޓީއަކަށް ވެގެންދާ ދުވަސް ކަމަށް ޑރ. ޝަހީމް ވިދާޅުވިއެވެ.

ހަމަ އެހެންމެ އިސްލާމިކް ޔުނިވާސިޓީ ކުރިއެރުމަށް އިސްލާމީ ކަންތައްތަކާ ބެހޭ ވުޒާރާއިން ދޭން ޖެހޭ އެންމެ ފުރިހަމަ އެއްބާރުލުން އަބަދުވެސް ދެއްވާނެކަމުގެ ޔަޤީންކަން ވެސް މިނިސްޓަރ ދެއްވި އެވެ.

"⁠ރާއްޖޭގައި އިސްލާމީ ހިދާޔަތު ދަމަހައްޓަން އިސްލާމީ ޔުނިވާސިޓީއަކީ މުހިއްމު މުއައްސަސާއެއް." މިނިސްޓަރު ވިދާޅުވި އެވެ.