ވިލާ ކޮލެޖުގެ ފެކަލްޓީ އޮފް ބިޒްނަސް މެނޭޖުމަންޓްގެ ނަން ވިލާ ކޮލެޖުގެ ވެރިޔާ އަދި ޖުމްހޫރީ ޕާޓީގެ ލީޑަރު ގާސިމް އިބްރާހިމް ސްކޫލް އޮފް ބިޒްނަސްގެ ނަމަށް ބަދަލުކޮށް ރީބްރޭންޑްކޮށްފި އެވެ.

ވިލާ ކޮލެޖުގެ ނަން ރީބްރޭންޑްކުރީ ވީ އިގްނައިޓް ނަމުގައި ބިޒްނަސް އިންކިއުބޭޝަން ސެންޓަރެއް ހުޅުވުމަށް އިއްޔެ ބޭއްވި ހާއްސަ ރަަސްމިއްޔާތުގަ އެވެ.

އެ ރަސްމިއްޔާތު ޝަރަފްވެރިކޮށްދެއްވީ އިކޮނޮމިކް މިނިސްޓަރު މުހައްމަދު ސައީދު އެވެ.

އިއްޔެގެ ރަސްމިއްޔާތުގައި ގާސިމް އިބްރާހިމް ބިޒްނަސް ސްކޫލްގެ ޑީން އަބްދުﷲ ނާފިޒް ވިދާޅުވީ މިއީ ހަމައެކަނި ނަމަށް އައި ބަދަލެއް ނޫން ކަމާއި، މިއީ އުންމީދީ ތަސައްވުރަކާއި އެކު ގެނެވުނު މުހިއްމު ބަދަލެއް ކަމަށެވެ. އަދި އަމާޒަކީ މި ސްކޫލަކީ ދުނިޔޭގެ ފެންވަރުގެ ބިޒްނަސް ސްކޫލަކަށް ހެއްދެވުން ކަމަށް ވިދާޅުވެ، މުސްތަޤުބަލް ބައްޓަންކުރެވިގެންދާނޭ ގޮތާއި ބެހޭ ކުރު ތަސައްވުރެއް އޭނާ ދެއްވިއެވެ.

ގާސިމް އިބްރާހިމްއަކީ ރާއްޖޭގެ އެންމެ ތަޖުރިބާކާރު އެންމެ ވަރުގަދަ އެއް ވިޔަފާރިވެރިޔާ އެވެ.

އެގޮތުން ވިލާ ހޮޓެލްސްގެ ދަށުން އެތަކެއް ޓޫެރިސްޓް ރިސޯޓްތައް ހިންގަމުންދާ އިރު ވިލާ އަކީ ރާއްޖޭގައި އެންމެ ފުޅާދާއިރާއެއްގައި ހަކަތައިގެ ވިޔަފާރިވެސް ހިންގާ ކުންފުންޏެވެ

ޤާސިމް އިބްރާހިމަކީ ދިވެހި ރައްޔިތުންނަށް ހިލޭސާބަހަށް ބޭސްފަރުވާ ކޮށްދެއްވުމާއި މަތީ ތަޢުލީމު ދިނުމުގައި ޚިދުމަތް ކުރެއްވި އަދި މިހާރުވެސް ކުރައްވަމުންގެންދަވާ ދިގު މާޒީއެއް އޮތް ބޭފުޅެކެވެ.