ހިޒްބުاللهގެ އާ ވެރިއަކަށް އެ ޖަމާއަތުގެ ޑެޕިއުޓީ ލީޑަރުގެ މަގާމުގައި ހުންނެވި މުޖާހިދު، ނާއިމް ޤާސިމް ހަމަޖައްސާފައިވާކަން ހިޒްބުاللهއިން އިއުލާންކޮށްފިއެވެ.

ހިޒްބުاللهއިން އެ ޖަމާއަތުގެ އާ ލީޑަރަކަށް އާ ބޭފުޅަކު އައްޔަންކޮށްފައި މިވަނީ ނިރުބަވެރި އިސްރާއީލުން ދިން ހަމަލާއެއްގައި އެ ޖަމާއަތުގެ ލީޑަރު ޙަސަން ނަޞްރުالله ޝަހީދުވުމާ ގުޅިގެންނެވެ.

ނަޞްރުالله ޝަހީދުވީ ސެޕްޓެންބަރު މަހުގެ ފަހުކޮޅު ލުބުނާނުގެ ވެރިރަށް ބެއިރޫތުގައި އިސްރާއީލުން ދިން ހަމަލާއެއްގައެވެ. އަދި އޭގެ ފަހުން އިސްރާއީލުން ވަނީ ހިޒްބުاللهގެ އެހެން ގިނަ އިސް އޮފިޝަލުންނަށް ވެސް ހަމަލާތައް އަމާޒުކޮށްފައެވެ.

ހިޒްބުاللهއިން ނެރުނު ބަޔާނެއްގައި ބުނެފައިވަނީ ޤާސިމް އެ ޖަމާއަތުގެ ލީޑަރުގެ މަގާމަށް އިންތިހާބުކުރެވުނީ އޭނާއަކީ ހިޒްބުاللهގެ އުސޫލުތަކާއި އަމާޒުތަކަށް ތަބާވާ ބޭފުޅަކަށް ވާތީ ކަމަށެވެ.

މެދުއިރުމަތީގައި އިސްރާއީލުން ހިންގަމުންދާ ޖަރީމާތަކުން ލުބުނާނަށް ދޭ ހަމަލާތައް ދިފާއުކުރުމަށް އެންމެ އިސް ސަފުގައި ހަރަކާތްތެރިވަނީ ހިޒްބުالله ޖަމާއަތެވެ. އަދި އެ ޖަމާއަތުގެ ހަތިޔާރު އެޅި މުޖާހިދުންނަށް ނިރުބަވެރި އިސްރާއީލުން އިންތިހާއަށް ބިރުގަންނައިރު އެ ޖަމާއަތް ނެތިކޮށްލަން މިއަދާ ހަމައަށްވެސް އިސްރާއީލަށް ވަނީ އެންމެ ވަރުގަދަ ހަތިޔާރާ އެކުވެސް ނުކުޅެދިފައެވެ.