ބޮލުން ހަންފޮޅުމަކީ ވަރަށް ގިނަ މީހުންނަށް ދިމާވާ ހާލަތަކަށް ވީއިރު މިކަމުގެ ސަބަބުން ބޯ ހިރުވައި، ތަފާތު އެކި އުނދަގޫތަކާ ކުރިމަތިލާން ޖެހެއެވެ. އެކި ކަހަލަ ޝޭމްޕޫތަކާއި ހެއާ ޓޮނިކުތައް ބޭނުންކޮށްގެންވެސް މިކަމަށް ހައްލެއް ނުލިބޭނަމަ މިކަމަށް ހައްލެއް ހޯދުމަށް ގުދުރަތީ ގޮތުން ލިބޭ އެއްޗެހި ބޭނުން ކުރެވިދާނެއެވެ. އެހެންކަމުން މިފަހަރު މި ހިމަނާލަނީ ބޮލުން ހަންފޮޅުން ހުއްޓުވުމަށް ބޭނުން ކުރަންވީ ބައެއް ބާވަތްތަކެވެ.

ކާށި ތެޔޮ

ކާށި ތެލަކީ ޒަމާނުއްސުރެ މީހުން އިސްތަށިގަނޑަށް ދިމާވާ އެކި މައްސަލަތައް ހައްލު ކުރަން ބޭނުން ކުރަމުން އައިސްފައިވާ އެއްޗެކެވެ. މިއީ ބޮލުގެ ހަންގަނޑު ހައިޑްރޭޓު ކޮށްދީ ދުޅަވުން ކުޑަކުރުމުގައި އެހީވެދޭ އެއްޗެކެވެ. މީގެ އިތުރުން މިއީ ބޮލުގެ ހަންގަނޑުގެ މައިކްރޯބައޯމް ރަނގަޅުކޮށް ހަންފޮޅުން ވެސް ހުއްޓުވައިދޭ އެއްޗެކެވެ.

އެލޮވީރާ

އެލޮވީރާ އަކީ އެންޓި-ބެކްޓީރިއަލް އަދި އެންޓި-ފަންގަލް ފްރޮޕަޓީތައް އެކުލެވޭ ވާވަތެކެވެ. އެހެންކަމުން މިއީ ހަންގަނޑުގެ އެކި މައްސަލަތައް ހައްލު ކުރުމަށްޓަކައި ބޭނުން ކުރެވޭނެ އެއްޗެކެވެ. މި ބޭނުން ކުރުމުން ހަންގަނޑު ދުޅަވުން ކުޑަކޮށްދީ ތަފަަތު އެކި ފަންގަސްތަކުގެ ސަބަބުން ދިމާވާ މައްސަލަތައްވެސް ހައްލު ކޮށްދެއެވެ. އަދި ބޮލުގައި ހަންފޮޅުންވެސް ހުއްޓުވައިދެއެވެ.

އެޕަލް ސިޑާ ވިނެގާ

އެޕަލް ސިޑާ ވިނެގާ އަކީވެސް ބޮލުގައި ހަންފޮޅުން ހުއްޓުވައިދިނުމަށް އެހީވެދޭ އެއްޗެކެވެ. މި ބޭނުން ކުރުމުން ބޮލުގެ ހަންގަނޑުގެ ޕީއެޗް ލެވެލް ބެލެންސް ކޮށްދީ ފަންގަސް އުފެދުން ހުއްޓުވައިދެއެވެ. އަދި އޭގެ ސަބަބުން ބޮލުގައި ހަންފޮޅުންވެސް ހުއްޓެއެވެ.

މަސްދަރު: ލައިވްމިންޓު.ކޮމް