ބިރުވެރި ފިލްމުތަކަކީ ވަރަށް ގިނަ މީހުން ބަލައި އުޅޭ، އަދި ގިނަ ބަޔަކަަށް ކަމުދާ ފިލްމުތަކެކެވެ. މިކަން މިހެން ވަނީ ކުޑައިރުއްސުރެ ޖިންނި ޝައިތާނުންގެ ވާހަކަތަކާއި ރޫހާނީ ބާރުތަކުގެ ވާހަކަ އަޑު އިވިއިވި އެކަމަށް ހޭނިފައިވާތީ ކަމަށްވެސް ވެދާނެއެވެ. މިފަހަރު މި ހިމަނާލަނީ މީހުންނަށް ބިރުވެރި ފިލްމުތައް ކަމުދާ 3 ސަބަބެވެ.

ބިރަކީ ފޯރިގަދަ ކަމެއް ކަމަށް ދެކޭތީ

ބައެއް މީހުން ބިރުވެރި ފިލްމު ބަލަނީ އަނެކާއަށް ބިރުވެރިކަމެއް ދިމާވުމަކީ އެއީ ފޯރިގަދަ ކަމެއް ކަމުގައި ދެކޭތީއެވެ. ބިރުވެރި ފިލްމުތައް ބެލުމުން މީހާގެ ހަށިގަނޑުން ސްޓްރެސް ހޯމޯނު ދޫކުރާވަރު އިތުރުވެ، އޭގެ ސަބަބުން ހިތުގެ ތެޅުން އަވަސްވެއެވެ. އަދި މިއީ ބައެއް މީހުންނަށް ވަރަށް ފޯރިގަދަ ކަމެކެވެ. ދިރާސާތަކުން ދައްކާ ގޮތުގައި އެންމެ ގިނައިން ބިރުވެރި ފިލްމު ބަލައި އުޅެނީ އެހެން މީހުންގެ އަޅާލުމާއި އޯގާތެރިކަން ބޭނުންވާ މީހުންނެވެ.

ބިރުވެރިކަމެއް ނިމުމުން ހިތަށްލުއިކަމެއް ލިބޭތީ

ބައެއް މީހުން ބިރުވެރި ފިލްމު ބަލަނީ ބިރުވެރިކަމެއް ނިމުމުން ހިތަށް ލުއިކަމެއް ލިބޭތީއެވެ. ބިރުވެރި ފިލްމު ބެލުމަކީ ރޯލާކޯސްޓެއް ދުއްވުންފަދަ ކަމެކެވެ. މި ފިލްމުތައް ބަލާ މީހުންނަށްް ތަފާތު އެކި ޖަޒުބާތުތައް އިހުސާސް ކުރެވެއެވެ. އަދި ފިލްމުގައި ދިމާވާ އެކިކަހަލަ ބިރުވެރި ހާދިޘާތައް ނިމޭއިރު ހިތަށް ފިނިކަމެއް ލިބި ހާސްކަން ފިލައި ދެއެވެ.

ހައްދުތައް ދެނެގަނެވޭތީ

ބިރުވެރި ފިލްމުތައް ބެލުމުން އަޅުގަނޑުމެންގެ ސިކުނޑީގައި ފޮރުވިފައިވާ އެންމެ ބޮޑެތި ބިރުތައް ދެނެގަނެވި، ބިރު އިހުސާސް ކުރުމުގެ ހައްދުތައް ދެނެގަނެވެއެވެ. އެހެންކަމުން ބައެއް މީހުން ބިރުވެރި ފިލްމު ބަލަނީ އެމީހެއްގެ ކިބައިގައި ބިރުވެރި ހާލަތްތަކާއި، އެ ޖަޒުބާތުތައް ތަހައްމަލު ކުރުމުގެ ގާބިލުކަން ހުރި މިންވަރު ދެނެގަތުމަށެވެ.

މަސްދަރު: އިންޑިއަންއެކްސްޕްރެސް