ޒަމާނަށް ފެތޭ ގޮތަށް އެންމެންވެސް ދިރިއުޅުން ބައްޓަން ކުރާ މި ޒަމާނުގައި، އަޅުގަނޑުމެންގެ ތެރެއިން ގިނަ މީހުންގެ އެންމެ ގާތް އެކުވެރިޔާ އަކީ ގެންގުޅޭ ސްމާޓު ފޯނޭ ބުނުމަކީ މުޅިއަކު ދޮގަކަށް ނުވާނެއެވެ. ކުދި ބޮޑު އެންމެން ސްމާޓު ފޯނަށް ދެވިހިފާފައިވާއިރު އަޅުގަނޑުމެންގެ ގިނަ ވަގުތުތަކެއް ހޭދަކުރެވެނީ އެ ފޯނުގެ ސްކްރީނަށް ބެލުމުގައެވެ. ކޮންމެވެސް ގޭމެއް ކުޅުމުގައި ނުވަތަ ރައްޓެއްސަކާ ވާހަކަދެއްކުމުގައެވެ.

ނަމަވެސް މިކަމުގެ ސަބަބުން ވަރަށް ގިނަ މީހުންގެ ދިރިއުޅުމަށް އެކިކަހަލަ ނޭދެވޭ އަސަރުތައް ކުރެއެވެ. އަދި މިކަމުގެ ސަބަބުން ހަޔާތުގެ ބައިވެރިޔާއާ މައްސަލަ ޖެހޭ ފަހަރުވެސް ވަރަށް ގިނައެވެ. ގިނަ ފަހަރަށް ފޯނަށް ގޮސް ހުސްވެ ހުރުމުގެ ސަބަބުން ކައިވެނިކޮށްގެން އުޅޭ މީހާއަށް ވަގުތު ދެވޭ ވަރު އޮންނަނީ މަދުވެފައެވެ. މިސާލަކަށް ބަލާނަމަ ދެމެފިރިން އެކުގައި އާއިލީ ބައްދަލުވުމަކަށް ގޮސް، އެކަކު ފޯނަށް ގޮސް ހުސްވެފަ ހުރެއްޖެނަމަ އޭގެ ސަބަބުން ބައިވެރިޔާ އެކަމާމެދު ހިތްހަމަ ނުޖެހުމަކީ ކައިވެނީގައި މައްސަލަ ޖެހޭ ކަމެކެވެ.

މިހެން ކަންތައް ވުމުން ބައިވެރިޔާ އާއި ދެމެދު އޮންނަ ގުޅުން ހީނަރުވެގެން ދިއުން އެކަށީގެންވެއެވެ. އަދި ދެމީހުންނަށް އެކަކު އަނެކަކާ ވާހަކަ ދައްކަން އުނދަގޫވެ، އޭގެ ސަބަބުން ހިތުގެ އުދާސްތައް ބޭރުކުރަން ފަސްޖެހެއެވެ. އަދި އޭގެ ސަބަބުން ބައިވެރިޔާއަށް އޭނާއަކީ ބާކީ ކޮށްލެވިފައިވާ ބޭކާރު މީހެއް ކަމުގެ އިހުސާސް ކުރެވި، ދެމީހުންގެ ދެމެދުގައި އޮންނަ ޖަޒުބާތީ ގުޅުމަށްވެސް އަސަރު ކުރެއެވެ.

ސްމާޓު ފޯނަކީ ދެމެފިރިންގެ ދެމެދުގައި މައްސަލަތައް ޖެހުމަށް މެދުވެރިވާ ސަބަބަކަށް ވީއިރު، ދެމެފިރިންގެ ގުޅުން ދެމެހެއްޓެނިވި ގުޅުމަކަށް ހަދަން ބޭނުންވާނަމަ މިކަމަށް ސަމާލުވުމަކީ ވަރަށް މުހިންމު ކަމެކެވެ. އަދި ފޯނުތަކާ ދުރަށް ގޮސް ބައިވެރިޔާ ހިތްހަމަ ޖައްސައިދިނުމަކީވެސް ވަރަށް މުހިންމު ކަމެކެވެ.