ކަދުރަކީ ތަފާތު އެކިކަހަލަ ނިއުޓްރިއެންޓުތަކާއި، ގުދުރަތީ ހަކުރުތަކާއި، ފައިބާ އެކުލެވޭ އެއްޗެެއްކަމުން މިއީ ހަށިގަނޑަށް ވަރަށް ފައިދާހުރި މޭވާގެ ބާވަތެކެވެ. އާންމުކޮށް ރަމަޟާން މަހު އަޅުގަނޑުމެންގެ ގޭބިސީތަކުން ފެންނަ ކަދުރަކީ ރޯދަ ވީއްލާއިރު އަނގަ ފޮނިކޮށްލުމަށް ގިނަ މީހުން ކައި އުޅޭ އެއްޗެކެވެ. މިއީ ފޮނި އެއްޗެއް ކަމުގައި ވީނަމަވެސް ކަދުރަކީ ބަރުދަން ލުއި ކުރުމުގައި އެހީވެދޭ އެއްޗެކެވެ.

ކަދުރަކީ އޭގައި ގިނަ އަދަދަކަށް ފައިބާ އެކުލެވޭ އެއްޗެކެވެ. އެހެންކަމުން މި ކެއުމުން ކާއެއްޗެހި ހަޖަމުވާ ވަރު ލަސްވެ އޭގެ ސަބަބުން ގިނަ އިރު ބަނޑު ފުރިފައި ހުރެއެވެ. އަދި އޭގެ ސަބަބުން ބަނޑުހައިވާވަރު މަދުވެ، ކާއެއްޗެހި ކެވޭވަރުވެސް މަދުވެއެވެ. އަދި ނަތީޖާއެއްގެ ގޮތުން މީހާގެ ބަރުދަންވެސް ލުއިވެއެވެ.

އަދި މިއީ ގުދުރަތީ ހަކުރު ހިމެނޭ އެއްޗެއްވެސް މެއެވެ. ކަދުރަކީ އޭގައި ފްރަކްޓޯސް، ގުލްކޯޒު، އަދި ސުކްރޯސް ފަދަ ގުދުރަތީ ހަކުރުތައް ހިމެނޭ އެއްޗެއް ކަމުން މި ކެއުމުން ފޮނި އެއްޗެހި ކަވައިގަންނަ ވަރު މަދުވެއެވެ. ވަރަށް ގިނަ މީހުންނަކީ ފޮނި އެއްޗެހި ނުކައި ނޫޅެވޭ މީހުންކަމުން، މިއީ އެފަދަ މީހުންނަށް "ސްވީޓު ކްރޭވިން" ތައް ފުއްދައިދިނުމަށް އެހީވެދޭ އެއްޗެކެވެ. އަދި އޭގެ ސަބަބުން ހަށިގަނޑަށް އެތެރެވާ ކެލޮރީތައް މަދުވެ، ބަރުދަން އިތުރުވުން ހުއްޓުވައިދެއެވެ.

އަދި މީގެ އިތުރުން މިއީ ގިނަ އަދަދަކަށް ވިޓަމިނާއި މިނަރަލްތައްވެސް ހިމެނޭ އެއްޗެކެވެ. އޭގެ ތެރޭގައި ބީ ވިޓަމިންތަކާއި، އަޔަން އާއި، ޕޮޓޭސިއަމް އަދި މެގްނީޒިއަމް ހިމެނެއެވެ. މި މާއްދާތަކަކީ ހަށިގަނޑުގައި ހަކަތަ އުފައްދައި ދީ ހަށިގަނޑުގެ މަސައްކަތްތައް އެންމެ ފުރިހަމަ ގޮތުގައި ކުރިއަށް ދިއުމަށް ކޮންމެހެން ބޭނުންތެރި މާއްދާތަކެކެވެ. އެހެންކަމުން ކަދުރު ކެއުމުން ހަށިގަނޑުގެ މެޓަބޮލިޒަމް ރަނގަަޅުވެ، ކެލޮރީތައް ވިރޭ ވަރު އިތުރުވެއެވެ. އަދި އޭގެ ސަބަބުން ބބަރުދަން ލުއިވެއެވެ.

ކަދުރަކީ މިނޫނަސް ވަރަށް ގިނަ ފައިދާތަކެއް އެކުލެވޭ އެއްޗެކެވެ. އެގޮތުން ބަލާއިރު ކަދުރަކީ ލޭގެ ހަކުރު އެއް ހަމައެއްގައި ހިފަހައްޓައި ދިނުމާއި، ހަޖަމުގެ މައްސަލަަތަކުން މީހާ ދުރުކޮށްދިނުމްށް އެހީވެދޭ އެއްވެކެވެ. އެހެންކަމުން ބަރުދަން ލުއިކުރަން ބޭނުންވާނަމަ މިއީ ޑައިޓުގައި ހިމަނާލުން ރަނގަޅު އެއްޗެކެވެ.