ނިރުބަވެރި އިސްރާއީލުން މެދުއިރުމަތީގެ ގައުމުތަކަށް ވަރުގަދަ ހަމަލާތަކެއްދީފިއެވެ.

އެމެރިކާގެ ހަތިޔާރުގެ އެހީގައި ނިރުބަވެރި އިސްރާއީލުން މެދުއިރުމަތީގެ ގައުމުތަކަށް ވަރުގަދަ ހަމަލާތަކެއްދީފިއެވެ. އެގޮތުން މި ހަމަލާތައް ފަލަސްތީނުގެ ޣައްޒާ އަށާއި ސީރިޔާ އަށާއި ލުބުނާނަށްވެސް ވަނީ އަމާޒުވެފައެވެ.

އިސްރާއީލުގެ ސިފައިން ޣައްޒާގެ އުތުރުގެ ސަރަހައްދަށް ގަދަކަމުން އަރައިގަނެ، ޣައްޒާ ސިޓީގެ ބައިތުލާހިޔާ އާއި ރަޟްވާން އަވަށަށް ދިން ދެ ހަމަލާގައި އެކަނިވެސް ފަލަސްތީނުގެ 88 މީހުން ވަނީ މަރުވެފައެވެ.

ނިރުބަވެރިންގެ ހަމަލާތައް ދެން އަމާޒުވީ ލުބުނާނާއި ސީރިއާއަށެވެ. މި ހަމަލާތަކުގައި ޞޫރުގައި ނުވަ މީހުން އަދި ތަދްމުރްގައި 36 މީހުން މަރުވެފައިވާކަމަށް އޮފިޝަލުންނާ ހަވާލަދީ ބޭރުގެ މީޑިޔާތަކުން ރިޕޯޓުކުރެއެވެ.

އެމެރިކާއިން އިސްރާއީލަށް ވާގިވެރިވެގެން ހިންގާ މި ހަނގުރާމަ ހުއްޓާލުމަށް ހިޒްބުالله އިން ވަނީ އެދިފައެވެ. އެގޮތުން އެ ޖަމާއަތުގެ ލީޑަރު ނާއިމް ޤާސިމް ޑިމާންޑް ކުރައްވަނީ ހަނގުރާމަ ހުއްޓާލުމުގެ ކޮންމެ އެއްބަސްވުމެއް ތަންފީޒު ކުރެއްވި ނަމަވެސް މުޅިން ހަނގުރާމަ ހުއްޓާލުމަށާއި "ލުބުނާނުގެ އިސްތިގުލާލު ހިމާޔަތް" ކުރުމަށެވެ.

ޣައްޒާގައި އިސްރާއީލުން ހިނގަމުންދާ ނަސްލު ނައްތާލުމުގައި އޮކްޓޯބަރު 7، 2023 އިން ފެށިގެން މިހާތަނަށް 43،985 ފަލަސްތީނު މީހުން މަރުވެ 104،092 މީހުން ވަނީ ޒަޚަމްވެފައެވެ.

ލުބުނާނަށް އިސްރާއީލުން ދެމުންދާ ހަމަލާތަކުގައި މިހާތަނަށް 3،558 މީހުން މަރުވެ 15،123 މީހުން ވަނީ ޒަޚަމްވެފައެވެ.