ލުބުނާނުގެ ދިފާއުގައި ހަރަކާތްތެރިވަމުންދާ ހިޒްބުالله ޖަމާއަތުން ނިރުބަވެރި އިސްރާއީލުގެ ތެލްއަވީވް އަށް 340 މިސައިލާއި ޑްރޯން ހަމަލާދީފިއެވެ.

ބޭރުގެ މީޑިޔާތަކުން ރިޕޯޓްކުރާ ގޮތުގައި ހިޒްބުاللهގެ މި ހަމަލާގައި ތެލްއަވީވްގެ ގިނަ ސަރަހައްދުތަކަށް ވަނީ ގެއްލުންވެފައެވެ. އެއްފަހަރާ ގިނަ އަދަދެއްގެ މިސައިލްތައް ފޮނުވާލުމުން އިސްރާއީލުގެ ވައިގެ ދިފާއީ ނިޒާމުވެސް ފުރިހަމައަށް މަސައްކަތް ނުކުރި ކަމަށް ރިޕޯޓްތައް ލިބެއެވެ.

މި ހަބަރު ކަށަވަރުކޮށްދެމުން ނިރުބަވެރި އިސްރާއީލުގެ ސިފައިންގެ ރޭޑިއޯއިން ބުނާ ގޮތުގައި ހިޒްބުالله އިން އެގައުމަށް 340 މިސައިލާއި ޑްރޯން ފޮނުވައި ތެލް އަވީވްގައި 11 މީހަކު ޒަޚަމްކޮށްލާފައިވާ ކަމަށެވެ. އަދި މި ހަމަލާތަކުގައި އެ ސިޓީއަށް "ބޮޑެތި ގެއްލުންތަކެއް" ދީފައިވާކަމަށް އިސްރާއީލުން ބުނެ އެވެ.

މި ދަނޑިވަޅުގައިވެސް ލުބުނާނުގެ ވެރިރަށަށް އިސްރާއީލުން ވައިގެ މަގުންދޭ ހަމަލާތައް ކުރިއަށްދާކަން ފާހަގަ ކުރެވެއެވެ. އަދި އިސްރާއީލުގެ ހަމަމާތައް ލުބުނާނުގެ ސްކޫލްތަކަށް އަމާޒުވާ މިންވަރު އިތުރުވެފައިވާއިރު އެގައުމުގެ އެޑިއުކޭޝަން މިނިސްޓްރީން ވަނީ ބެއިރޫތުގެ ސްކޫލްތަކުގައި ކިޔަވައިދިނުން ޖެނުއަރީ މަހުގެ ނިޔަލަށް ސަސްޕެންޑް ކޮށްފައެވެ.

އެމެރިކާގެ މަދަދާއެކު އިސްރާއީލުން ލުބުނާނުގައި ހިންގާ ޖަރީމާތަކުގައި މިހާތަނަށް ކުށެއްނެތް 3،754 މީހުން މަރުވެ 15،626 މީހުން ޒަޚަމްވެފައިވެއެވެ.