ސިވިލް ސާވިސްއިން ބަންޑާރަ ނައިބުގެ އޮފީސް ވަކިކުރަން ބިލެއް ހުށަހަޅައިފި އެވެ.

ސަރުކާރުގެ ފަރާތުން މާފަންނު ދެކުނު ދާއިރާގެ މެމްބަރު އަބްދުﷲ ރިފާއު ހުށަހެޅުއްވި އެ ބިލުގެ ފުރަތަމަ ކިއުން ރައްޔިތުންގެ މަޖިލީހުގެ މިއަދުގެ ޖަލްސާގައި ވަނީ އިއްވައިފަ އެވެ.

"ބަންޑާރަ ނައިބުގެ އޮފީހުގެ ބިލު" ނަމުގައި ހުށަހެޅި އެ ބިލުގެ މަގުސަދަކީ ބަންޑާރަނައިބާ މަތިކޮށްފައިވާ ޒިންމާތަކާއި މަސްއޫލިއްތޔަތުތައް އަދާކުރުމަށްޓަކައި ބަންޑާރަނައިބުގެ އޮފީހުގެ ނަމުގައި ސިވިލް ސާވިސްގައި ނުހިމެނޭ ސަރުކާރުގެ ވަކި އޮފީހެއް ގާއިމުކޮށް އެ އޮފީހުގެ މަސައްކަތްތައް ރޭވިފައިވާ ގޮތާއި އެ އޮފީސް ހިންގުމާ ބެހޭ އުސޫލުތަކާއި އަދި އެ އޮފީހުގެ މުވައްޒަފުންނާއި ގުޅޭ އެންމެހާ އުސޫލުތައް ކަނޑައެޅުން ކަމުގައި ބުނެފައި ވެއެވެ.

ބިލުގައި ބުނެފައިވާ ގޮތުގައި ބަންޑާރަ ނައިބުގެ އޮފީހުގެ އިދާރީ އޮނިގަނޑު އެކަށައަޅައި އެ އޮފީހުގެ އެކި ޑިޕާޓްމަންޓްތަކާއި ޑިވިޝަންތަކާއި ސެކްޝަންތަކާއި ޔުނިޓްތައް ކަނޑައަޅައި އެ ތަންތަނުގެ މަސައްކަތްތައް އިންތިޒާމްކޮށް ކަނޑައަޅާނީ ބަންޑާރަ ނައިބެވެ.

ހަމަ އެހެންމެ ބަންޑާރަ ނައިބުގެ އޮފީހުގެ މަސްއޫލިއްޔަތުތައް އަދާކުރުމުގެ ގޮތުން ބަންޑާރަނައިބުގެ އޮފީހުގެ ދަށުން ހިންގާ ވަކި އިދާރާއެއް ނުވަތަ އިދާރާއެއް ގާއިމުކޮށް ހިންގުމުގެ އިހުތިޔާރު ބަންޑާރަ ނައިބަށް ލިބިގެންވާކަމަށް ވެސް ބިލުގައި ބުނެފައި ވެއެވެ.