އަންނަ އަހަރު ޙައްޖަށް ދިއުމަށް ޖާގަލިބިފައިވާ އެންމެނަށް ޙައްޖަށް ދެވޭނެ ކަމަށް އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.

މީސްމީޑިއާގައި ޙިއްސާ ކުރެއްވި މެސެޖެއްގައި ވަޒީރު ޑރ. ޝަހީމް ވިދާޅުވީ 2025 ވަނަ އަހަރު ޙައްޖުގެ އަޅުކަން އަދާކުރުމުގެ ޖާގަ ޙައްޖު ކޯޕަރޭޝަންގެ ސިސްޓަމްގެ ތެރެއިން ދެވިފައިވާ އެންމެހައި ފަރާތްތަކަށް ޙައްޖަށް ދިއުމުގެ ފުރުޞަތު ލިބޭނެ ކަމަށެވެ.

ޑރ. ޝަހީމް މިހެން ވިދާޅުވެފައިވާއިރު ޙައްޖު ކޯޕަރޭޝަންގެ ވެއިޓިންގ ލިސްޓަށް ބަދަލު އައިސްފައިވާކަމުގެ ތުހުމަތު ބައެއް ޢާއްމުން މީސްމީޑިއާގައި ދަނީ ކުރަމުންނެވެ. ނަމަވެސް ޙައްޖު ކޯޕަރޭޝަންގެ އެމްޑީ ޝަކީލް މިއަދު ވަނީ އެތުހުމަތުތައް ދޮގު ކުރަށްވާފައެވެ.

1446 (2025) ވަނަ އަހަރު ޙައްޖުގެ އަޅުކަން އަދާކުރުމުގެ ޖާގަ ކޯޕަރޭޝަންގެ ސިސްޓަމްގެ ތެރެއިން ޔަޤީންކަން ދެވިފައިވާ އެންމެހައި ފަރާތްތަކަށް ޙައްޖަށް ދިއުމުގެ ފުރުޞަތު ލިބޭނެ. އިންޝާ ﷲ

— Mohamed Shaheem Ali Saeed (@Mohamedshaheem1) December 3, 2024

އަންނަ އަހަރު ޙައްޖަށް ދިއުމަށް ޖާގަލިބިފައިވާ އެންމެނަށް ޙައްޖަށް ދެވޭނެކަމުގެ ޔަޤީންކަން ވަޒީރު ދެއްވާފައިވާއިރު މިދިޔަ އަހަރު ރާއްޖެއިން ހައްޖަށް ގޮސްފައި ވަނީ، 1،150 މީހުނެވެ.

ޙައްޖު ކޯޕަރޭޝަނަކީ ކުރީގެ ރައީސް ޔާމީންގެ ވެރިކަމުގައި މިހާރުގެ އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސައީދުގެ އިސްނެންގެވުމާއިއެކު އުފައްދާފައިވާ ކުންފުންޏެކެވެ. އެ ކުންފުނި އުފެދުނު ފަހުން ޙައްޖާއި އުމްރާ ދަތުރުތަކަށް ބޮޑެތި ލުއިތަކެއް އައިސްފައިވާކަން ފާހަގަ ކުރެވެއެވެ.

ރާއްޖެއަށް 2024 ވަނަ އަހަރު ލިބުނު ހުރިހާ ޙައްޖު ކޯޓާއެއް ދިނީ ޙައްޖު ކޯޕަރޭޝަނަށެވެ.