ދިރިއުޅުމުގައި ކާމިޔާބު މީހަކަށްވާން ކޮންމެ މީހަކުވެސް ބޭނުންވެއެވެ. މިކަމާ ހަމައަށް ވާސިލް ވުމަށްޓަކައި ތަފާތު އެކިކަންތައް ކުރަންވެސް ޖެހެއެވެ. އެގޮތުން ކުރުން އެންމެ މުހިންމު އެއް ކަމަކީ އަމިއްލަ އުފެއްދުންތެރިކަން އިތުރު ކުރުމެވެ. މިފަހަރު މި ހިމަނާލަނީ އުފެއްދުންތެރިކަން އިތުރު ކުރަން ބޭނުންވާނަމަ ކުރަންވީ ބައެއް ކަންކަމެވެ.

ދުވާލުގެ ވަގުތުތައް އެކިކަންކަމަށް ބަހާލުން

އަމިއްލަ އުފެއްދުންތެރިކަން އިތުރުކުރަން ބޭނުންވާނަމަ ދުވާލުގެ ވަގުތުތައް ވަރަށް ރަނގަޅަށް ބަހާލުމަކީ ވަރަށް މުހިންމު ކަމެކެވެ. އެގޮތުން ދުވާލުގެ ވަގުތުތައް ކަންކަމަށް ކަނޑައަޅާއިރު އެންމެ ގިނަ ވަގުތު ބޭނުންވާ ކަންކަން ފާހަގަ ކޮށް އެކަންކަމަށް ސަމާލުކަން ދިނުމަކީ ވަރަށް މުހިންމު ކަމެކެވެ. މިހެން ހެދުމުން މީހާއަށް މާ ބޮޑަށް ބުރަ ނުވެ ކަންތައްތައް އަވަހަށް ނިންމޭނެއެވެ.

ނިދުމުގެ ކުރިން ދުވަހާމެދު ވިސްނައި އަނެއް ދުވަހަށްވެސް އަލިއަޅުވާލުން



ނިދަން އޮށޯވެ އޮވެ ނިދުމުގެ ކުރިން ދުވަހުގެ ކަންތައް ދިޔަގޮތާމެދު ވިސްނައި، މާދަމާ ކަންތައް ކުރާނެ ގޮތާމެދު ވިސްނުމަކީވެސް އުފެއްދުންތެރިކަން އިތުރު ކުރަން ބޭނުންވާނަމަ ކުރަން ޖެހޭ ކަމެކެވެ. މިހެން ހެދުމުން އެދުވަހަކު ނުކުރެވި ހުރި ކަންތައް ފާހަގަ ކުރެވޭނެއެވެ. އަދި އެކަންތައް އަނެއް ދުވަހު ކުރަން އަޒުމު ކަނޑައަޅައި އެކަމަށް ވަގުތުވެސް ހުސް ކުރެވޭނެއެވެ.

މަލްޓި ޓާސްކު ނުކުރުން



މަލްޓި ޓާސްކު ކުރުން ނުވަތަ އެއް ފަހަރާ ގިނަ ކަންތައްތައް ކުރުމަކީ އަޅުގަނޑުމެންގެ ތެރޭގައި ވަރަށް ގިނަ މީހުން ކުރާ ކަމެކެވެ. ނަމަވެސް އެއްފަހަރާ މާގިނަ ކަންތައް ކުރާނަަމަ އޭގެ ސަބަބުން ބޭކާރު ވަގުތުތަކެއް ގެއްލެއެވެ. އަދި މިހެން ކަންތައް ކުރާނަމަ ސިކުނޑިއަށް މާބަރުވެ ކަންކަން ހަނދާން ނެތޭ ގޮތްވެސް ވެއެވެ. އެހެންކަމުން އުފެއްދުންތެރިކަން އިތުރު ކުރަން ބޭނުންވާނަމަ އެކުރާ އެއް ކަމަކަށް ސަމާލުކަން ދީގެން ހުރުމަކީ ވަރަށްވެސް މުހިންމު ކަމެކެވެ. މިހެން ހެދުމުން އެކުރާ ކަމެއް އޭގެ އެންމެ ފުރިހަމަ ގޮތުގައި ނިންމޭނެ އެވެ.

މަސްދަރު: ޓުޑޭއި.ކޮމް