ބަރުދަން ލުއިކޮށް ހަށިގަނޑުގެ ބައްޓަން ރީތިކުރުމަށް ކޮންމެ މީހަކުވެސް ބޭނުންވެއެވެ. މިކަމަށްޓަކައި ތަފާތު އެކިކަހަލަ ބުއިންތައް ބޭނުން ކުރާ މީހުންވެސް އަޅުގަނޑުމެންގެ ތެރޭގައި އުޅެއެވެ. މިފަހަރު މި ބަލާލަނީ ކާބޮނޭޓަޑް ފެނުގެ ސަބަބުން ބަރުދަނަށް ކުރާ އަސަރަށެވެ.

އާންމު ގޮތެއްގައި ބަރުދަން ލުއިކުރަން މަސައްކަތް ކުރާ ގިނަ މީހުން ކާބޮނޭޓޭޑު ފެން ބުއިމާ ދުރުހެލި ވެއެވެ. ނަމަވެސް އާ ދިރާސާއަކުން ދައްކާ ގޮތުގައި ކާބަނޭޓެޑް ފެން ބުއިމުން މީހާގެ ބަރުދަން ލުއިވުމުގައި އެހީތެރިވެދެއެވެ.

ޖާނަލް އޮފް ނިއުޓްރިޝަނަލް ސައިންސް އެންޑް ވައިޓަމިނޮލޮޖީގައި ޝާއިޢުކުރެވުނު މި ދިރާސާއިން ދައްކާ ގޮތުގައި ކާބަނޭޓެޑް ފެން ބުއިމުން ބަނޑުހައިހޫނުކަން ކުޑަކޮށް، ކެއުމުގެ ކުރިން ބަނޑު ފުރާލުމަށް އެހީތެރިވެދެއެވެ. މިކަން މިހެން ވަނީ ކާބަނޭޓެޑް ފެނުގައި ހުންނަ ކާބަން ޑައިއޮކްސައިޑްގެ ސަބަބުންނެވެ. މީގެ ސަބަބުން މި ފެން ބުއިމުން މީހާއަށް ބަނޑު ފުރިފައިވާ ކަމުގެ އިހުސާސް ކުރެވި، އޭގެ ސަބަބުން ކާން ބޭނުންވާ މިންވަރު މަދުވެއެވެ. އަދި އޭގެ ސަބަބުން މި ދިރާސާގައި ބައިވެރިވި މީހުންގެ ބަރުދަން ލުއިވެފައިވާ ކަމަށް ރިޕޯޓުގައި ވެއެވެ.

ނަމަވެސް މި ދިރާސާއަކީ ކުޑަ މުއްދަތެއްގެ ދިރާސާއެއް ކަމުގައި ވުމުން، ކާބޮނޭޓެޑް ފެނުން ބަރުދަނަށް ކުރާ އަސަރު މާ ރަނގަޅަކަށް ދެނެގަނެވިފައެއް ނުވެއެވެ. ކާބަނޭޓެޑް ފެނަކީ އެސިޑުތަކެއް އެކުލެވޭ ފެނެއް ކަމުން މި ބޭނުން ކުރުމުން މީހާގެ ހަށިގަނޑަށް އޭގެ ނޭދެވޭ އަސަރު ކުރާ ކަމަށް އެހެން ރިޕޯޓު ތަކުގައި ވެއެވެ.

ވީމާ ބަރުދަން ލުއިކުރަން މި ބޭނުންް ކުރުމަކީ އެހާ ރަނގަޅު ކަމެއް ނޫނެވެ. ބަރުދަން ލުއިކުރަން ބޭނުންވާނަމަ އެންމެ ރަނގަޅު ގޮތަކީ ރަނގަޅު ކާނާ ކެއުމާއި، ގަވާއިދުން ކަސްރަތުކުރުމާއި، އެކަށީގެންވާ މިންވަރަށް ނިދުމެވެ.