އިސްރަށްވެހިންނަކީ ޤައުމު ބިނާކުރުމުގައި ވަރަށް ޒިންމާދާރު، ހަރުދަނާ މަސައްކަތްތަކެއް ކުރައްވާފައިވާ ޤައުމުގެ ރައުސުލްމާލެއް ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ އުނގޫފާރު ސައިފު ޖަމްޢިއްޔާއިން އިންތިޒާމުކުރި އިސްރަށްވެހިންގެ ހަވީރުގައި ބައިވެރިވެ ވަޑައިގަތުމަށްފަހު، މީސްމީޑިއާގައި ޙިއްސާ ކުރަށްވާފައިވާ މެސެޖެއްގައެވެ.

އެގޮތުން ވަޒީރު ވިދާޅުވެފައިވަނީ، ޤައުމުގެ ކުރިމަގު ބައްޓަންކުރުމުގައި އިސްރަށްވެހިންގެ ތަޖުރިބާ ހިއްސާކުރުން މުހިންމު ކަމަށެވެ. އަދި އުނގޫފާރު ސައިފު ޖަމްޢިއްޔާއިން އެ ފުރުޞަތު އިސްރަށްވެހިންނަށް ފަހިކޮށްދެއްވާތީ އުފާފުޅުކުރައްވާ ކަމަށް ވެސް ވަޒީރު ވިދާޅުވެފައިވެއެވެ.

އިސްރަށްވެހިންނަކީ ޤައުމު ބިނާކުރުމުގައި ވަރަށް ޒިންމާދާރު، ހަރުދަނާ މަސައްކަތްތަކެއް ކުރައްވާ، ޤައުމުގެ ރައުސުލްމާލެއް. ޤައުމުގެ ކުރިމަގު ބައްޓަން ކުރުމުގައި އިސްރަށްވެހިންގެ ތަޖުރިބާ ހިއްސާކުރުން ވަރަށް މުހިންމު. އުނގޫފާރު ސައިފުޖަމިއްޔާއިން އެފުރުޞަތު ފަހިކޮށްދޭތީ އުފާކުރަން. pic.twitter.com/uhGRkifx1d

— Adam Shareef Umar (@Adamshareefz) June 27, 2025

ވަޒީރު އާދަމް ޝަރީފް ރ. އަތޮޅަށް މިހާރު ކުރަށްވަމުން ގެންދަވާ ދަތުރުފުޅުގައި، އުނގޫފާރު ސައިފު ޖަމްޢިއްޔާއިން ބޭއްވެވި އިސްރަށްވެހިންގެ ހަވީރުގައި ބައިވެވަޑައިގެން އުފާވެރި ވަގުތުކޮޅެއް އިސްރަށްވެހިންނާއެކު ވަނީ ހޭދަކުރައްވާފައެވެ.

މި ހަވީރަކީ ޖަމްޢިއްޔަތުއްސައިފަށް 64 އަހަރު ފުރުމާ ގުޅިގެން ބޭއްވި ހަވީރެއް ކަމަށް ސިޓީތަކާއި އިދާރީ ދާއިރާތައް ހިންގުމާއި، އާންމު މަސައްކަތްތަކާއި ބެހޭ ވުޒާރާއިން ހާމަކޮށްފައިވެއެވެ.