ރ. ފައިނުގައި މިމަހުގެ 26 ވަނަ ދުވަހުގެ ރޭ ހިނގި އެކްސިޑެންޓުގައި އަނިޔާވި 2 ކުދިންނަށް ވެންޓިލޭޓަރުން ނަގާފައިވާ ކަމަށާއި، ނަމަވެސް ޓީޗަރަށް އަދިވެސް ފަރުވާ ދެމުންދަނީ ވެންޓިލޭޓަރުގައި ކަމަށް އައިޖީއެމްއެޗުން ހާމަކޮށްފިއެވެ.

ފައިނު ސޯސަންމަގުގައި އެ އެކްސިޑެންޓް ހިނގީ 18 އަހަރުން ދަށުގެ ކުއްޖަކާއި ފައިނު ސްކޫލްގެ ދަރިވަރަކު ދުއްވި ސައިކަލެެއް މަގުމަތީގައި ކަސްރަތަށް ހިނގަން ނުކުމެ އުޅުނު އެ ރަށު ސްކޫލްގެ ޕްރިންސިޕަލާއި ޓީޗަރެއްގެ ގައިގައި ޖެހިގެންނެވެ.

އައިޖީއެމްއެޗުން ބުނީ، މި އެކްސިޑެންޓުގައި ހާލު ސީރިއަސްވެފައިވަނީ، 49 އަހަރުގެ ފިރިހެނަކާއި، 16 އަހަރު އަދި 14 އަހަރުގެ ދެ ފިރިހެން ކުދިން ކަމަށެވެ.

އޭގެތެރެއިން އަނިޔާވި ދެކުދިން ވެންޓިލޭޓަރުން ނެގި ނަމަވެސް، އަދިވެސް ފަރުވާ ދެމުންދަނީ އައިސީޔޫގައި ކަމަށް އެ ހޮސްޕިޓަލުން މަޢުލޫމާތު ދީފައިވެއެވެ. އަދި ޓީޗަރަށް އަދިވެސް ފަރުވާ ދެމުންދަނީ އައިސީޔޫގައި ވެންޓިލޭޓަރުގައި ކަމަށްވެސް ބުނެފައިވެއެވެ.

ނަމަވެސް ދެކުދިންނާއި ޓީޗަރަށް ވެފައިވާ އަނިޔާތަކުގެ ތަފްސީލު އެނގިފައެއް ނުވެއެވެ.

މި އެކްސިޑެންޓުގައި އަނިޔާވި، ފައިނު ސްކޫލްގެ ޕްރިންސިޕަލަށް އުނގޫފާރު ރީޖަނަލް ހޮސްޕިޓަލުގައި ފަރުވާ ދިނުމަށްފަހު ވަނީ ދޫކޮށްލާފައެވެ.

ފުލުހުން ބުނެފައިވަނީ، އެ އެކްސިޑެންޓުގައި ހިމެނޭ ސައިކަލު ޓޯކޮށް މައްސަލަ އިތުރަށް ތަހުގީގު ކުރަމުންދާ ކަމަށެވެ.