އިދިކޮޅު އެމްޑީޕީއަށް 20 އަހަރުވުމާއި ދިމާކޮށް ކުޅުދުއްފުށީގައި ބާއްވަން ނިންމި ބޮޑު ޖަލްސާ މޫސުން ގޯސްވުމުން ފަސްކޮށްފިއެވެ.

މި ޖަލްސާ ބާއްވަން ނިންމާފައި އޮތީ މާދަމާރޭ ކުޅުދުއްފުށީ ސިޓީގައެވެ. އެ ޖަލްސާއަށް މާލެއިން ދާ މީހުން މިރޭ ބާދުޝާހު ބޯޓުން ފުރަން އޮތީ ނިންމާފައެވެ. އެމްޑީޕީން ބުނީ މޫސުން ތަން ނުދިނުމުގެ ސަބަބުން މިރޭ ބާދުޝާހު ބޯޓުން ކުރަން ހަމަޖެހިފައިވާ ދަތުރު ފަސްކޮށްފައިވާކަމަށެވެ. އަދި ދަތުރަށް ފުރާ ގަޑި ފަހުން ހާމަކުރާނެކަމަށްވެސް އެ ޕާޓީން ބުންޏެެވެ.

އެމްޑީޕީން ބުނިގޮތުގައި މާދަމާ ބާއްވަން އޮތް ޖަލްސާވެސް މިހާރު ވަނީ ފަސްކޮށްފައެވެ. އެ ޕާޓީން ބުނީ މޫސުން ތަންދޭނަމަ ޖަލްސާ އޮންނާނީ ހޮނިހިރު ދުވަހުގެ ރޭ ކުޅުދުއްފުށި ސިޓީގައިކަމަށެވެ.

އެ ޖަލްސާގައި ބައިވެރިވުމަށް ޕާޓީގެ ލީޑަރޝިޕްގެ ބައެއް އިސްބޭފުޅުން މިހާރު ވަނީ ކުޅުދުއްފުއްޓަށް ވަޑައިގެންފައެވެ. އޭގެ ތެރޭގައި ކުރީގެ ރައީސް އިބްރާހިމް މުހައްމަދު ސާލިހްވެސް ހިމެނިވަޑައިގަންނަވައެވެ.