ރޭޕްގެ ތުހުމަތުގައި ދެކުނު ކޮރެއާގެ ކޭޕޮޕް ތަރި، މޫން ޓެއިލް، 3 އަހަރު ދުވަހުގެ މުއްދަތަކަށް ޖަލަށްލައިފިއެވެ.

ދެކުނު ކޮރެއާގެ މަޝްހޫރު ކޭޕޮޕް ގްރޫޕް އެންސީޓީއަށް ނިސްބަތްވާ މޫން ޓެއިލް، 31، ތިން އަހަރާއި ހަމަސް ދުވަހުގެ ޖަލު ހުކުމެއް އިއްވާފައިވަނީ ދެކުނު ކޮރެއާގެ ވެރިރަށް ސޯލް ގައި ޗައިނާގެ ފަތުރުވެރިއަކު ރޭޕްކުރި މައްސަލައެއްގައެވެ.

ޓެއިލް އާއެކު އިތުރު ދެމީހަކަށްވެސް ވަނީ މިމައްސަލައިގައި ޖަލުހުކުމެއް އިއްވާފަ އެވެ. މިމައްސަލައިގައި، މަސްތުގެ ހާލަތުގައި ހޭނެތިފައިވާ އަންހެނަކަށް ޖިންސީ ގޯނާކޮށް ރޭޕް ކުރިކަމަށް މިތިންމީހުންވެސް ވަނީ އެއްބަސްވެފައެވެ.

މިމައްސަލަ ފުރަތަމަ ފެންމަތިވުމުން ލަވަކިޔުންތެރިޔާ ޓެއިލް ވަނީ މިދިޔަ އަހަރުގެ އޮގަސްޓް މަހު އޭނާގެ ކޭ ޕޮޕް ގްރޫޕް، އެންސީޓީ ދޫކޮށްފަ އެވެ.

2016 ވަނަ އަހަރު އުފެދުނު އެންސީޓީ އަކީ މިހާރު ދުނިޔޭގެ ފެންވަރުގައި ތަޖުރިބާކާރު މިއުޒިކީ ފަންނާނުން ހިމެނޭ، އަދި ބައިނަލްއަގްވާމީ މިއުޒިކް ޗާޓްތަކުގައިވެސް ކާމިޔާބު ހޯދަމުންދާ މަޝްހޫރު ކޭޕޮޕް ގްރޫޕެކެވެ.