އީރާނުގެ ނިޔުކްލިޔަރ ޕްރޮގްރާމު ހުއްޓުވުމަށް އެމެރިކާއިން ކުރިމަތިކުރަމުންދާ ފިއްތުންތައް އިތުރަށް ވަރުގަދަކުރުމުގެ ގޮތުން، އީރާނުގެ ސަރުކާރާ ގުޅުން ހުރި 115 ފަރާތަކާ ދެކޮޅަށް އެމެރިކާއިން ދަތިކުރުމުގެ ފިޔަވަޅުތަކެއް އަޅައިފިއެވެ.

އެގޮތުން މައިގަނޑު ގޮތެއްގައި މި ފިޔަވަޅުތައް އަމާޒުކޮށްފައިވަނީ އީރާނުގެ ރޫހާނީ ލީޑަރ އާޔަތުالله ޢަލީ ޚާމަނާއީގެ މުޝީރު އަލީ ޝަމްޚާނީގެ ދަރިކަލުން މުޙައްމަދު ޙުސެއިން ޝަމްޚާނީގެ ޝިޕިންގ ވިޔަފާރިތަކަށެވެ.

މިއީ 2018 ވަނަ އަހަރަށްފަހު، އެމެރިކާގެ ރައީސް ޑޮނަލްޑް ޓްރަމްޕްގެ ފުރަތަމަ ވެރިކަމުގައި އީރާނާ ގުޅުންހުރި ވިޔަފާރިތަކާ ދެކޮޅަށް އެޅި އެންމެ ވަރުގަދަ ފިޔަވަޅު ކަމަށް އެމެރިކާގެ ޓްރެޝަރީ ޑިޕާޓްމެންޓުން ވަނީ ބުނެފައެވެ.

މި ފިޔަވަޅުތަކުގެ ދަށުން ޖުމްލަ 17 ޤައުމެއްގައި ހަރަކާތްތެރިވާ 52 އުޅަނދަކާއި، 12 ފަރުދަކާއި 53 ކުންފުންޏެއް ހިމެނެއެވެ.

އެމެރިކާގެ އޮފިޝަލުން ބުނާ ގޮތުގައި މި ފިޔަވަޅުތަކުގެ ސަބަބުން އީރާނަށް ތެޔޮ ވިއްކުމަށް ދަތިވި ނަމަވެސް ދުނިޔޭގެ ތެލުގެ ބާޒާރަށް މާބޮޑު ލޮޅުމެއް ނާއްނާނެއެވެ.

މި ފިޔަވަޅުތަކާމެދު ކަންބޮޑުވުން ފާޅުކުރަމުން އީރާނުގެ ޚާރިޖީ ވުޒާރާއިން ބުނީ މިއީ އީރާނާ މެދު އެމެރިކާއިން ގެންގުޅޭ ޢަދާވާތްތެރިކަމުގެ ސާފު މިސާލެއް ކަމުގައެވެ. އަދި ޔޫރަޕިއަން ޔޫނިއަނުން ވެސް މި މަހު ޝަމްޚާނީއާ ދެކޮޅަށް ދަތިކުރުމުގެ ފިޔަވަޅުތަކެއް އަޅާފައިވާކަން އެ ވުޒާރާއިން ފާހަގަކޮށްފައި ވެއެވެ.

އީރާނުގެ ނިޔުކްލިޔާ ޕްރޮގްރާމު އަލުން ފަށައިފިނަމަ އިތުރު ފިޔަވަޅުތައް އަޅާނެ ކަމުގެ އިންޒާރު ޓްރަމްޕު ވަނީ ދީފައެވެ.