ކާރިސާތަކުން ލިބޭ ގެއްލުންތައް ރިޕޯޓުކުރުމާއި ތަފާސްހިސާބު ބެލެހެއްޓުމުގެ މަސައްކަތް ހަރުދަނާކުރުމުގެ ގޮތުން، ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން 'ޑެމޭޖް އެސެސްމަންޓް އެންޑް ލޮސް އެނަލިސިސް' (ޑާލާ) ޕޯޓަލް ރަސްމީކޮށް އިފްތިތާހްކޮށްފިއެވެ.

ޔޫއެންޑީޕީގެ ފަންޑިންގް ވިންޑޯގެ ތެރެއިން ޑެންމާކް، ލަގްޒެމްބާގް އަދި ދެކުނު ކޮރެއާގެ އެހީތެރިކަމާއެކު ތަރައްޤީކޮށްފައިވާ މި ޕޯޓަލްއަކީ އެންޑީއެމްއޭގެ މަސައްކަތްތައް ޑިޖިޓަލައިޒްކޮށް، ކާރިސާތަކުގެ މައުލޫމާތު އެއްކޮށް ބެލެހެއްޓުމަށް ތަރައްޤީކޮށްފައިވާ މަންސައެކެވެ.

މީގެ ކުރިން މެނުއަލްކޮށް ކުރަމުންދިޔަ ކާރިސާތަކުގެ ގެއްލުން ވަޒަންކުރުމުގެ މަސައްކަތް، މި ޕޯޓަލްގެ ސަބަބުން ފަސޭހަ، ރައްކާތެރި އަދި ގުޅިފައިވާ ޑިޖިޓަލް ނިޒާމަކަށް ބަދަލުވެގެންދާނެ ކަމަށް އެންޑީއެމްއޭއިން ބުނެއެވެ.

މި ޕޯޓަލް މެދުވެރިކޮށް އޮންލައިންކޮށް ކާރިސާތަކުގެ މަޢުލޫމާތު ކަމާގުޅޭ މުއައްސަސާތަކަށް ރިޕޯޓުކުރެވޭނެ ކަމަށް އެންޑީއެމްއޭއިން ވަނީ ބުނެފައެވެ. އަދި ލިބުނު ގެއްލުންތަކުގެ ހިސާބުކޮށް، ބަދަލު ދިނުމުގެ މަރުހަލާތައް ވެސް މި ނިޒާމުގެ ތެރެއިން ފުރިހަމަކުރެވޭނެ ކަމަށް އެންޑީއެމްއޭއިން ފާހަގަކުރެއެވެ.

މި ޕޯޓަލް އިފްތިތާހުކޮށްދެއްވަމުން ހޯމް މިނިސްޓަރ އަލީ އިހުސާން ވިދާޅުވީ މިއީ ރައީސް ޑރ. މުޙައްމަދު މުޢިއްޒުގެ 'މޯލްޑިވްސް 2.0' ސިޔާސަތުގެ ތެރެއިން ކުރެވުނު މުހިންމު މަސައްކަތެއް ކަމަށެވެ. އަދި ޑާލާ މެދުވެރުކޮށް ކާރިސާތަކަށް އިޖާބަދިނުމުގެ ބަދަލުގައި އެކަމަށް ތައްޔާރުވާން ފުރުޞަތު ލިބޭ ކަމަށާއި، މިއީ މޯލްޑިވްސް 2.0ގެ އެއް އަސާސް ކަމަށްވެސް މިނިސްޓަރ ވަނީ ވިދާޅުވެފައެވެ.

މި ސިސްޓަމްގެ ހުރިހާ މަސައްކަތެއް މިހާރު ނިމި، ރަށްރަށުގައި މައުލޫމާތު އަޅާނެ ފަރާތްތަކަށް އެކްސެސް ދެވިފައިވާ ކަމަށް އެންޑީއެމްއޭއިން ހާަމަކުރިއެވެ. އަދި މި ނިޒާމުގެ ސަބަބުން ރައްޔިތުންގެ އިތުބާރު އެންޑީއެމްއޭގެ މަސައްކަތްތަކަށް އިތުރަށް ލިބިގެންދާނެ ކަމަށްވެސް އެންޑީއެމްއޭއިން ބުނެއެވެ.

އެންޑީއެމްއޭއިން ވަނީ ވޭތުވެދިޔަ 5 އަހަރުގެ ކާރިސާތަކުގެ މައުލޫމާތު ވެސް މިހާރު މި ޕޯޓަލްއަށް އަދާހަމަކޮށްފައެވެ. މީގެ ސަބަބުން ގެއްލުންވި ފަރާތްތަކަށާއި ކައުންސިލްތަކަށް، އަދި ގުޅުންހުރި އެހެނިހެން އިދާރާތަކަށް ހުރިހާ ތަފްސީލެއް އެއްތަނަކުން ފެންނަން ހުންނާނެ ކަމަށް އެ އޮތޯރިޓީން ބުނެއެވެ.