ދިރާސީ އާ އަހަރުގެ ކިޔެވުން މިއަދު ފަށައިފިއެވެ.

މިދިޔަ ޑިސެންބަރު މަހުގެ 25 ވަނަ ދުވަހު ދަރިވަރުންނަށް ލިބުނު ބޮޑު ޗުއްޓީއަށް ފަހު މިއަދު ސްކޫލްތަކުގެ ކިޔެވުން ފަށާފައިވަނީ، 80،000 އަށްވުރެ ގިނަ ދަރިވަރުންނާ އެކުގައެވެ.

ތަޢުލީމާބެހޭ ވުޒާރާއިން ބުނީ، މި އަހަރު 4،790 ދަރިވަރުން އަލަށް ސަރުކާރު ސްކޫލުތަކުގެ ގްރޭޑް އެކެއްގައި ކިޔަވަން ފަށާފައިވާ ކަމަށެވެ. އަދި މި އަހަރު މާލެއަށް އަތޮޅުތަކުން 1،530 ދަރިވަރުން ވަނީ ބަދަލުވެފައެވެ.

މާލެ ސަރަޙައްދުގެ ސްކޫލްތަކަށް އޮންނަ ބޮޑު ޑިމާންޑަށް ހައްލެއް ހޯދުމަށް ސަރުކާރުން ކުރަމުންދާ މަސައްކަތުގެ ދަށުން، މިއަހަރުގެ ދިރާސީ އަހަރާއެކު ހުޅުމާލޭ ފޭސް 2 ގައި 1900 ދަރިވަރުންގެ ޖާގަ ހިމެނޭ ގޮތަށް ޢިމާރާތްކުރި، ޝަހީދު ޢަލީ ސްކޫލް މިއަދު ވަނީ ހުޅުވާފައެވެ.

މެދުކެނޑުމަކަށްފަހު ދިރާސީ އާ އަހަރުގެ ކިޔެވުން ޖަނަވަރީ މަހު ފަށާފައިވާއިރު، ފުރަތަމަ ޓާމް ނިންމައި މި އަހަރުގެ ޖުލައި މަހުގެ 17 ވަނަ ދުވަހު ދަރިވަރުންނަށް ޓާމް ޗުއްޓީ ލިބޭނެއެވެ. އަދި ބޮޑު ޗުއްޓީ ލިބޭނީ ޑިސެންބަރު މަހުއެވެ.