އިސްލާމްދީނަށާއި ދިވެހި ޤައުމަށް ލޯބިކުރާ، އުޅުމާއި ސުލޫކު ރަނގަޅު، ހަރުދަނާ އަދި ހީވާގި ދަރީންތަކެއް، ބިނާކުރެވޭނީ، ތަޢުލީމާއި ތަރުބިއްޔަތަށް އަހައްމިއްޔަތުކަން ދީގެން ކަމަށް، ރައީސުލްޖުމުހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ދިރާސީ އައު އަހަރު ފެށުމުގެ މުނާސަބަތުގައި މީސްމީޑިއާގައި ހިއްސާކުރެއްވި މެސެޖެއްގައި ރައީސް ވަނީ، ދިރާސީ އާއަހަރު، މިއަދު ފެށުމާ ގުޅިގެން، ތަޢުލީމީ ދާއިރާގެ އެންމެހާ ހިންގުންތެރީންނާ، ޓީޗަރުންނާ، ބެލެނިވެރީންނާ، ދަރިވަރުންނަށްވެސް ކާމިޔާބީއަށް އެދިވަޑައިގެންފައެވެ.

ހަމައެއާއެކު ތަޢުލީމީ ނިޒާމު ހަރުދަނާކޮށް ކުރިއެރުވުމަށާއި ހެޔޮލަފާ، ތޫނުފިލި، އުޅުންރީތި، ދަރީންތަކެއް، ދިވެހި ތަޢުލީމީ ހިޔާވަހިތަކުގައި، ބޮޑެތި ކުރުމުގެ ހެޔޮ ތައުފީޤު ދެއްވުން އެދި އެމަނިކުފާނުގެ މެސެޖުގައި ދުޢާ ކުރަށްވާފައިވެއެވެ.

ދިރާސީ އާ އަހަރު ފެށުމުގެ މުނާސަބަތުގައި ރައީސުލްޖުމުހޫރިއްޔާގެ އަނބިކަނބަލުން ސާޖިދާ މުޙައްމަދު ފޮނުއްވި މެސެޖުގައި، ދިރާސީ އައު އަހަރުގެ ހެޔޮ އެދުމާއި ތަހުނިޔާ، ދަރިވަރުންނާއި، ބެލެނިވެރިންނާ، އެދުރުންނާ، ހިންގުންތެރިންނާ، އެހީތެރިންނަށް އަރިސްކުރައްވާފައި ވެއެވެ. އަދި، ކޮންމެ ކިޔަވާ ކުއްޖަކަށްވެސް މި ދިރާސީ އައު އަހަރަކީ، ފާގަތި، ބާއްޖަވެރި އަހަރަކަށް ވުމަށް އެދިވަޑައިގެންފައި ވެއެވެ.

މިދިޔަ ޑިސެންބަރު މަހުގެ 25 ވަނަ ދުވަހު ދަރިވަރުންނަށް ލިބުނު ބޮޑު ޗުއްޓީއަށް ފަހު މިއަދު ސްކޫލްތަކުގެ ކިޔެވުން ފަށާފައިވަނީ، 80،000 އަށްވުރެ ގިނަ ދަރިވަރުންނާ އެކުގައެވެ.