ސަރުކާރު ހިއްސާވާ ކުންފުނި، ވޭސްޓް މެނޭޖުމެންޓު ކޯޕަރޭޝަން (ވެމްކޯ) ގެ މުވައްޒަފުންގެ މުސާރައިން އުނިކުރާ ޕެންޝަން ފައިސާ، ޕެންޝަން ފަންޑަށް ޖަމާނުކުރާތާ 14 މަސް ދުވަސް ވެފައިވާކަން ހާމަވެއްޖެއެވެ. މިކަން ފަޅާއަރާފައިވަނީ ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ހުޅުމާލެ ފޭސް 1 ގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާއެއްގައި، އެ ކުންފުނީގެ މުވައްޒަފަކު ކުރި ޝަކުވާއަކާ ގުޅިގެންނެވެ.

މައުލޫމާތު ހޯދައި ލިބިގަތުމުގެ ހައްގުގެ ދަށުން އިންފޮމޭޝަން ކޮމިޝަނަރުގެ އޮފީހުން ހާމަކޮށްފައިވާ ތަފާސްހިސާބުތަކަށް ބަލާއިރު، ވެމްކޯއިން އެންމެ ފަހުން ޕެންޝަން ފަންޑަށް ފައިސާ ދައްކާފައިވަނީ 16 އޮކްޓޫބަރު 2024 ގައެވެ. އޭގެ ފަހުން ފާއިތުވި 14 މަސް ދުވަހުގެ ތެރޭގައި އެއްވެސް ފައިސާއެއް ޖަމާކޮށްފައި ނުވާއިރު، ޕެންޝަނަށް ނުދައްކާ ހުރި ފައިސާގެ އަދަދު މިހާރު 20 މިލިއަން ރުފިޔާއަށް ވުރެ ބޮޑުވެފައިވާކަން ވަނީ އެނގިފައެވެ.

މި މައްސަލައާ ގުޅިގެން ވެމްކޯއިން ބުނެފައިވަނީ، ގަވާއިދުން ޕެންޝަން ފައިސާ ޖަމާނުކުރެވެނީ ކުންފުނީގެ ކޭޝް ފްލޯއަށް ދިމާވެފައިވާ ދަތިތަކުގެ ސަބަބުން ކަމަށެވެ. އެގޮތުން، އެކި ފަރާތްތަކަށް ފޯރުކޮށްދީފައިވާ ޚިދުމަތްތަކަށް ލިބެންޖެހޭ ފައިސާ ގަވާއިދުން ނުލިބުމަކީ މުވައްޒަފުންގެ އިނާޔަތްތައް ދިނުމަށް އޮތް ބޮޑު ހުރަހެއް ކަމަށް އެ ކުންފުނިން ފާހަގަކުރެއެވެ. މީގެ އިތުރުން، ކުންފުނީގެ ހިންގުމުގެ ޚަރަދުތަކާއި މުސާރަ މިހާރު ހަމަޖައްސަނީ ކުންފުންޏަށް ލިބޭ އާމްދަނީގެ އިތުރުން ސަރުކާރުން ދޭ ސަބްސިޑީގެ އެހީގައި ކަމަށްވެސް ވެމްކޯއިން ބުނެފައިވެއެވެ.

ޕެންޝަން ފައިސާގެ މައްސަލަ ހައްލުކުރުމަށްޓަކައި ފިނޭންސް މިނިސްޓްރީއާ އެކު މަޝްވަރާ ކުރަމުންދާ ކަމަށް ވެމްކޯއިން ބުނި ނަމަވެސް، މިކަމާ ގުޅޭގޮތުން އިތުރު ތަފްސީލު ހޯދުމަށް އެ ކުންފުނީގެ އެމްޑީ މުޖުތަބާ ޖަލީލަށް ގުޅުމުން ފޯނަށް ޖަވާބު ދެއްވާފައި ނުވާތީ އެކުންފުނީގެ ރަސްމީ ބަހެއް ވަނީ ލިބޭގޮތް ނުވެފައެވެ. މުވައްޒަފުންގެ މުސާރައިން ފައިސާ އުނިކުރުމަށްފަހު، ގާނޫނީ ގޮތުން ލާޒިމްކުރާ ފަންޑަށް އެ ފައިސާ ޖަމާނުކުރާތީ ގިނަ މުވައްޒަފުން ދަނީ ކަންބޮޑުވުން ފާޅުކުރަމުންނެވެ.