ހުޅުމާލޭ ދެވަނަ ފިޔަވަހީގެ ހިޔާ ޓަވަރު 5 ގައި މިރޭ ހިނގި އަލިފާނުގެ ހާދިސާގައި، އެ އިމާރާތުގެ މައި ފާޚާނާ ހޮޅިއަށް ބޮޑެތި ގެއްލުންތަކެއް ލިބި، ބައެއް އެޕާޓްމެންޓުތަކުގެ ފާޚާނާ ބޭނުންނުކުރެވޭ ހާލަތަށް ގޮސްފައިވާ ކަމަށް ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ހާމަކޮށްފިއެވެ.

ހުޅުމާލޭ ދެވަނަ ފިޔަވަހީގެ ހިޔާ ޓަވަރު 5 ގައި އަލިފާން ރޯވީ އެ ޓަވަރުގެ ވައިގޮޅިއެއްގެ ތެރޭގައެވެ. މި ހާދިސާގައި އެއްވެސް އެޕާޓްމެންޓަކަށް ސީދާ ގޮތެއްގައި ބޮޑު ގެއްލުމެއް ލިބިފައި ނުވި ނަމަވެސް، ފެތުރިގެންދިޔަ ކަޅު ދުމުގެ ސަބަބުން ރައްކާތެރިކަމުގެ ފިޔަވަޅެއްގެ ގޮތުން ދެ އެޕާޓްމެންޓެއްގެ މީހުން ވަނީ ހުސްކޮށްފައެެވެ.

ނެޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން އެކްސްގައި ކުރި ޕޯސްޓެއްގައި ބުނީ އަލިފާނުގެ ސަބަބުން އިމާރާތުގެ މައި ނަރުދަމާ ހޮޅިއަށް ލިބުނު ގެއްލުންތަކާ ގުޅިގެން ބައެއް ޔުނިޓުތަކުގެ ފާޚާނާ ބޭނުންކުރުމުގައި ދަތިތަކެއް ކުރިމަތިވެފައިވާ ކަމަށެވެ. މިހާރު ކުރިއަށްދަނީ ލިބުނު ގެއްލުންތައް ވަޒަންކޮށް، މަރާމާތުގެ މަސައްކަތްތައް ފެށުން ކަމަށާއި މި މަސައްކަތުގައި އެމްއެންޑީއެފް، ފުލުހުން، އެޗްޑީސީ އަދި އެމްޑަބްލިއުއެސްސީ ގުޅިގެން ހަރަކާތްތެރިވަމުން އަންނަ ކަމަށް އޮތޯރިޓީ އިން ބުނެއެވެ.

މި ހާދިސާއާ ގުޅިގެން އެމްއެންޑީއެފުން ބުނީ ހިޔާ ޓަވަރު 5 ގައި އަލިފާން ރޯވި ކަމުގެ ރިޕޯޓު ލިބުމާއެކު ފަޔާ އެންޑް ރެސްކިއު ސާވިސްއިން ވަނީ ވަގުތުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައިވާ ކަމަށެވެ. ނަމަވެސް، ހާދިސާ ހިނގަން މެދުވެރިވި ސަބަބާ ގުޅޭ އިތުރު ތަފްސީލެއް މިހާތަނަށް ހާމަކޮށްފައެއް ނުވެއެވެ