އީރާނާއެކު އެއްވެސް ކަހަލަ މަޝްވަރާއެއް ނުވަތަ އެއްބަސްވުމަކަށް ނުދާނެ ކަމަށާއި، އެއްވެސް ޝަރުތެއް ނެތި އީރާނުން ހަތިޔާރު ބަހައްޓައި އަމާން ދޭން ޖެހޭނެކަމަށް އެމެރިކާގެ ރައީސް ޑޮނަލްޑް ޓްރަމްޕު ވިދާޅުވެއްޖެއެވެ.

ޓްރަމްޕްގެ އަމިއްލަ ސޯޝަލް މީޑިއާ ޕްލެޓްފޯމް ކަމަށްވާ "ޓްރުތު ސޯޝަލް" ގައި ކުރެއްވި ޕޯސްޓެއްގައި ވިދާޅުވީ، އީރާނުން "ޝަރުތެއް ނެތި އަމާންދިނުން" ފިޔަވައި އެހެން އެއްވެސް ކަމެއް އެމެރިކާއިން ގަބޫލު ނުކުރާނެ ކަމަށެވެ. މިއީ މިދިޔަ ފެބްރުއަރީ މަހުގެ 28 ވަނަ ދުވަހު ފެށުނު ހަނގުރާމައަށްފަހު، އެމެރިކާގެ މަގްސަދުތައް އެންމެ ސާފުކޮށް ޓްރަމްޕް ހާމަކުރެއްވި ފުރަތަމަ ފަހަރެވެ. މީގެ އިތުރުން، ފާއިތުވި ދުވަސްތަކުގައި ބައެއް ގައުމުތަކުން ސުލްހައަށްޓަކައި ކުރަމުންދިޔަ ޑިޕްލޮމެޓިކް މަސައްކަތްތަކަށްވެސް ޓްރަމްޕްގެ މި ބަޔާނާއެކު ވަނީ ހުރަސް އެޅިފައެވެ.

ޓްރަމްޕްގެ ޕޯސްޓުގައި ހަމައެކަނި އަސްކަރީ ގޮތުން އަމާންދިނުމަށް ގޮވާލެއްވުމުގެ އިތުރުން، އީރާނުގެ ވެރިކަމުގެ ނިޒާމަށް ބަދަލު ގެނައުމަށްވެސް ވަނީ ބާރުއަޅުއްވާފައެވެ. އޭނާ ވިދާޅުވި ގޮތުގައި، އީރާނުން އަމާންދިނުމަށްފަހު "މޮޅު އަދި ބަލައިގަނެވޭނެ ފަދަ" ލީޑަރަކު ނުވަތަ ލީޑަރުންތަކެއް އައްޔަން ކުރަންޖެހޭނެއެވެ. މިއީ އީރާނުގެ މުސްތަގުބަލުގެ ސަރުކާރު އެކުލަވާލުމުގައި ވޮޝިންގޓަނުން ބަސްބުނަން ބޭނުންވާކަމުގެ އިޝާރާތެއް ކަމަށް މަސްރަހު ދިރާސާކުރާ ފަރާތްތަކުން ދެކެއެވެ.

އީރާނުގެ މަސްރަހަށް ބަލާއިރު، ފެބްރުއަރީ 28 ގައި ދިން ހަމަލާތަކުގައި އެގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ އަވަހާރަވުމާ ގުޅިގެން، މިވަގުތު އެގައުމުގައި ދާއިމީ ރޫހީ ލީޑަރެއް ނެތެވެ. މިވަގުތު ގައުމު ހިންގަމުންދަނީ ވަގުތީ ލީޑަރޝިޕް ކައުންސިލަކުންނެވެ. އީރާނުގެ ގާނޫނުއަސާސީގެ ދަށުން ރޫހީ ލީޑަރު އައްޔަންކުރުމުގެ ބާރު ލިބިފައިވާ 88 މެންބަރުންގެ މައްޗަށް އެކުލެވޭ "އެސެމްބްލީ އޮފް އެކްސްޕާޓްސް" އަށް އައު ލީޑަރަކު އައްޔަންކުރުމަށް ބޮޑެތި ފިއްތުންތަކެއް ވަނީ ކުރިމަތިވެފައެވެ. އީރާނުގެ ގާނޫނު ހަދާ މަޖިލީހުގެ މެންބަރަކު ވިދާޅުވި ގޮތުގައި، ކުރިއަށް އޮތް މަދު ދުވަސްކޮޅެއްގެ ތެރޭގައި އައު ރޫހީ ލީޑަރެއްގެ ނަން އިއުލާން ކުރެވޭނެއެވެ.

ޓްރަމްޕްގެ ޕޯސްޓް ނިންމާލައްވާފައިވަނީ އޭނާގެ މަޝްހޫރު ސިޔާސީ ޝިއާރު ކަމަށްވާ "މޭކް އެމެރިކާ ގްރޭޓް އަގެއިން" އާ އެއްގޮތްވާ ގޮތަށް، އީރާނަށް އައު އުއްމީދުތަކެއް ދެއްވަމުންނެވެ. އޭނާ ވިދާޅުވީ، އެމެރިކާއާއި އެގައުމުގެ ބައިވެރިން ގުޅިގެން އީރާނު ހަލާކުގެ ތެރެއިން ސަލާމަތްކޮށް، އިގްތިސާދީ ގޮތުން ކުރިއަށްވުރެ ވަރުގަދަ ގައުމަކަށް ހަދާނެ ކަމަށެވެ. ޓްރަމްޕް ވިދާޅުވީ، "އީރާނަށް އޮތީ އުޖާލާ މުސްތަގުބަލެއް. މޭކް އީރާން ގްރޭޓް އެގެއިން" މިފަދައިންނެވެ.